ახალციხეში საახალწლო ღონისძიება 26 დეკემბერს გაიმართება

საახალწლო ზეიმი 15:00 საათზე დაიწყება. საახალწლო სიმღერებსა და ცეკვებს მარინა მჭედლიძისა და ირინა დედიანის საესტრადო გუნდის ბავშვები შეასრულებენ.

საახალწლო კონცერტზე მიწვეულები არიან სკოლამდელი აღზრდის დაწესებულებების აღსაზრდელები, ახალციხის მეშვიდე საჯარო სკოლის მოსწავლეები და გრიგოლ ხანძთელის ქუჩაზე მცხოვრები დევნილი ოჯახების ბავშვები. მათ თოვლის ბაბუა საახალწლო საჩუქრებს გადასცემს.

ღონისძიება ახალციხის მუნიციპალიტეტის კულტურის, სპორტის, ძეგლთა დაცვისა და ახალგაზრდული სამსახურის ორგანიზებით ხორციელდება.

საახალწლო კონცერტი ახალი წლის ღამესაცაა დაგეგმილი, თუმცა, არა ისეთი მასშტაბური, როგორც ეს გასულ წლებში იყო.

23:30 საათზე ახალციხელებს 2014 წლის დადგომას ანსამბლი "მესხეთი" მრავალჟამიერით მიულოცავს.

"ამ დღეს ყველას სახლში ყოფნა უნდა და გადავწყვიტეთ მასშტაბური ღონისძიება აღარ გავმართოთ". სიმბოლურად, "მრავალჟამიერით" მივულოცავთ ახალციხელებს", - ამბობს ახალციხის მუნიციპალიტეტის კულტურის, სპორტის, ძეგლთა დაცვისა და ახალგაზრდული სამსახურის უფროსი კახა კოპაძე.

[მანანა სარაშვილი, ახალციხე]