ახალციხეში ბავშვები კულტურის სამინისტროს საჩუქრის გარეშე დარჩნენ

სამი წლის ზურა ვარდიძე დედამ საახალწლო ზეიმზე მიიყვანა, თუმცა მას საჩუქარი აღარ შეხვდა. ზურას დედა ამბობს, რომ ხალხმრავლობის გამო თოვლის ბაბუასთან მიახლოებაც კი ვერ შეძლეს. ზურას მსგავსად საჩუქრის გარეშე არაერთი პატარა დარჩა.

ზეიმზე უსაჩუქროდ დარჩენილი პატარების მშობლები არაორგანიზებულობაზე საუბრობენ. იგივეს აცხადებს ბაღების გაერთიანების უფროსი ნანა გელაშვილი, რომლის შვილს ასევე არ შეხვდა სამინისტროს საახალწლო საჩუქარი.

"ზოგი რამდენჯერმე მიდიოდა საჩუქრის ასაღებად. როგორ უნდა გაეგოთ ვინ პირველად იყო და ვინ მეორედ. ამიტომაც მოხდა ასე", - აცხადებს კულტურის სამსახურის უფროსი კახა კოპაძე.

"იყო უამრავი პატარა, ბევრი უკმაყოფილოც დაგვრჩა სამწუხაროდ. მათ ვისაც საჩუქარი არ შეხვდა, ვეპატიჟებით ახალი წლის ღამეს“,- ამბობს ახალციხის კულტურის სამსახურის სპეციალისტი მარინა გოგოლაძე.

საახალწლო ზეიმის ორგანიზატორი ახალციხის მუნიციპალიტეტის გამგეობის კულტურის, სპორტის, ძეგლთა დაცვისა და ახალგაზრდულ საქმეთა სამსახური იყო. სამსახურის უფროსის კახა კოპაძის თქმით, საჩუქრები კულტურის სამინისტრომ შეიძინა.

ზეიმზე 700-მდე ბავშვი იყო მიწვეული: საბავშვო ბაღებიდან, მე-7 სკოლიდან და პატარები დევნილი ოჯახებიდან. კულტურის სამსახურში ამბობენ, რომ სამინისტროს ახალციხისთვის 1000 საჩუქარი ჰქონდა შეძენილი, თუმცა, არ უარყოფენ, რომ საჩუქრის გარეშე პატარები ნამდვილად დარჩნენ.



[თინათინ ზაზაძე, ახალციხე]