ახალციხის მუნიციპალიტეტის გამგებლის მრჩეველი შვებულებიდან სამსახურში აღარ დაბრუნდა

ახალციხის მუნიციპალიტეტის გამგებლის მრჩეველს გოჩა პარუნაშვილს და გამგებლის მოადგილეს მალხაზ ჟუჟუნაძეს დროებით უფლებამოსილება 27 აგვისტოს შეუწყდათ. ამ დღიდან დაიწყო ოფიციალურად ფუნქციონირება კოალიცია „ქართული ოცნების“ ოფისმა ახალციხეში. აქ ჟუჟუნაძე შტაბის უფროსად, პარუნაშვილი კი აქტივის კოორდინატორად გადავიდა.

არჩევნების შემდეგ, შვებულების ვადის ამოწურვისას, მალხაზ ჟუჟუნაძე სამუშაო ადგილზე დაბრუნდა, პარუნაშვილი კი არა.
ახალციხის მუნიციპალიტეტის გამგეობაში აცხადებენ, რომ პარუნაშვილი ხელშეკრულებით იყო აყვანილი და წინასაარჩევნოდ ხელშეკრულება პირადი განცხადების საფუძველზე შეუწყდა.

თავად პარუნაშვილი იმას, რომ გამგეობაში სამუშაოდ აღარ დაბრუნდა სწავლის გაგრძელებით ხსნის, ამბობს, რომ დისერტაციაზე უნდა იმუშაოს და საამისოდ დრო სჭირდება.

„თბილისში გადავიდვარ, სალექციო კურსის ჩატარებაც შემომთავაზეს და ამიტომ, - ამბობს იგი და ამატებს, - არ არის გამორიცხული გამგებლის მრჩევლად ისევ დავბრუნდე“.

კითხვაზე, მის ნება-სურვილზეა დამოკიდებული გამგებლის მრჩევლად დაბრუნება-არდაბრუნების საკითხი გვიპასუხობს: „ახლა გზაში ვარ და დეტალებზე სხვა დროს ვისაუბროთ“.

ახალციხის მუნიციპალიტეტის გამგეობაში აცხადებენ, რომ ჯერ-ჯერობით გამგებლის მრჩევლის პოსტზე არავინ განიხილება.
შეგახსენებთ, რომ ახალციხის მუნიციპალიტეტის გამგებლის მოვალეობის შემსრულებელმა ბესიკ ბლიაძემ პარუნაშვილი მრჩევლად მიმდინარე წლის 3 აპრილს დანიშნა. მაშინ პარუნაშვილი პარალელურად ”ენერგო-პრო ჯორჯიას” სამხრეთ საქართველოს ფილიალის იურისტადაც მუშაობდა.

გამგეობაში მრჩევლის სტატუსით თანამშრომლის აყვანის შესახებ გაუკვირდათ სამოქალაქო კულტურის საერთაშორისო ცენტრის გამგეობის თავმჯდომარეს კოტე კანდელაკს და ინფორმაციის თავისუფლების განვითარების ინსტიტუტის გამგეობის თავმჯდომარეს ლევან ავალიშვილს.

”სამინისტროებში არის მრჩევლის შტატი და ის ოფიციალურად საჯარო მოხელედ ითვლება, მაგრამ თვითმმართველობებში მრჩევლის თანმდებობის შესახებ არ გამიგია. უნდა იყოს მაგალითად სპეციალისტი, უფროსი სპეციალისტი, ან რაიმე ასეთი”, - ამბობს კანდელაკი.
გამგებელმა ბესიკ ბლიაძემ კი პარუნაშვილის მრჩევლად აყვანა ასე ახსნა: „გვჭირდებოდა და იმიტომ ავიყვანეთ“.

პარუნაშვილმა აღნიშნულ პოსტზე 5 თვე იმუშავა.

[თამუნა უჩიძე, ახალციხე]