რაში სჭირდება გამგეობას სამი იურისტი?

ახალციხის მუნიციპალიტეტის საკრებულოში განმარტავენ, რომ იურიდიული სამსახური სოფლის მეურნეობის სამსახურის გაუქმების ხარჯზე ჩამოყალიბდა.

„სოფლის მერუნეობის სამსახური, რომელიც ახალციხის მუნიციპალიტეტის გამგეობის ერთ-ერთი სტრუქტურული ერთეული იყო, გაუქმდა, რადგან ეს წაიღო ცენტრალურმა ხელისუფლებამ. ამ გამოთავისუფლებული შტატების ბაზაზე იურიდიული სამსახური შეიქმნა, რომელიც მანამდე წარმოდგენილი იყო მხოლოდ ერთი იურისტით“, - განმარტავს ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

ახალი სამსახურის ჩამოყალიბების შემდეგ ახალციხის მუნიციპალიტეტის გამგეობას ცალკე მხოლოიდ იურისტი აღარ ეყოლება. იურიდიულ სამსახურში სამი თანამშრომელი: სამსახურის უფროსი და ორი სპეციალისტი დასაქმდება.

ახალციხის მუნიციპალკიტეტის საკრებულოს დეპუტატი და ყოფილი საკრებულოს თავმჯდომარე მალხაზ გიქოშვილი ახალი სამსახურის ჩამოყალიბების აუცილებლობას ვერ ხედავს. მისი თქმით, გამგეობას სამი ან ოთხი იურისტი არ სჭირდება.

„რა საბუთებია ისეთი, ეს ხომ არ არის პროკურატურა, ან სასამართლო, რაში სჭირდება გამგებელს მრჩეველი იურიდიულ საკითხებში, მოადგილე იურიდიულ საკითხებში და სპეციალისტი?! რა საქმე უნდა იყოს აქ ისეთი, რომ ერთმა იურისტმა ვერ გადაწყვიტოს?“ - ამბობს მალხაზ გიქოშვილი.

ახალი სამსახურის ჩამოყალიბების შემდეგ, გაუქმდება იურიდიულ საკითხებში გამგებლის მრჩეველის შტატი, რომელიც მიმდინარე წლის აპრილში შეიქმნა. ოლეგ სანდროშვილის თქმით, მრჩევლის შტატის იმიტომ დაუშვეს, რომ გამგეობის ერთი იურისტი იმ საქმიანობას მარტო ვერ უძღვებოდა, რაც მას ჰქონდა დაკისრებული.

„გამგებლის მრჩეველი იურიდიულ საკითხებში იყო ხელშეკრულებით, გარკვეული ვადით აყვანილი. როცა ახალი სამსახური ჩამოყალიბდება, თავისთავად ცხადია გაუქმდება ხელშეკრულება“, - განმარტავს ოლეგ სანდროშვილი.

შგახსენებთ, რომ იურიდიულ საკითხებში გამგებლის მრჩეველის მოვალეობას გოჩა პარუნაშვილი ასრულებს.

[თამარ თოთაძე, ახალციხე]