ახალციხის მუნიციპალიტეტის გამგებლის მრჩევლად გოჩა პარუნაშვილი 3 აპრილიდან მუშაობს. ამავდროულად, იგი ”ენერგო-პრო ჯორჯიას” სამხრეთ საქართველოს ფილიალის იურისტიცაა.
”ჩვენთან ორი იურისტი მუშაობს, თამარ კოვზიაშვილი და გოჩა პარუნაშვილი”, - გვითხრა ”ენერგო-პრო ჯორჯიას” სამხრეთ საქართველოს ფილიალის საზოგადოებასთან ურთიერთობის სამსახურის სპეციალისტმა გიორგი ბალახაშვილმა.
ორ სამსახურში ერთდროულად რომ მუშაობს, თავად პარუნაშვილიც გვიდასტურებს: ”დიახ, ”ენერგო-პროში” იურისტი ვარ,იქ რიგი პროცედურებია დასამთავრებელი, მინდობილობებია გაცემული ჩემ სახელზე”.
თუმცა ის, რომ ერთდროულად ორი თანამდებობა ეკავა მას ”სამხრეთის კარიბჭესთან”
მიცემულ ინტერვიუში, რომელიც მისი დანიშვნისთანავე ჩაიწერა, არაფერი უთქვამს. მაშინ პარუნაშვილმა ბიოგრაფიის მოყოლისას ჟურნალისტს განუცხადა რომ ის ”ენერგო-პრო ჯორჯიაშიც” მუშაობდა.
საჯარო სამსახურის შესახებ კანონის თანახმად, საჯარო მოხელეს უფლება აქვს ეწეოდეს მხოლოდ სამეცნიერო და პედაგოგიურ საქმიანობას, მას სხვა კომერციულ, ან კერძო სტრუქტურაში მუშაობა ეკრძალება.
”ეს 64-ე მუხლი ”სამსახურებრივი შეუთავსებლობაა. კანონი ორივე სამსახურიდან გათავისუფლებას ითვალისწინებს”, - ამბობს ადვოკატი ნუგზარ სამარჯიშვილი.
პარუნაშვილი აცხადებს, რომ იგი მრჩევლის თანამდებობაზე ხელშეკრულებითაა აყვანილი. ამდენად, მოხელის სტატუსი არ აქვს და შესაბამისად, არც კანონს არღვევს: ” ჩემი სტატუსი შემოიფარგლება მხოლოდ და მხოლოდ იურიდიულ საკითხებში რჩევით საკანონმდებლო ბაზასთან მიმართებაში. წმინდა ადმინისტრაციული კუთხით სალექციო კურსიც გვქონდა იურისტებთან, გავდივართ წმინდა სამეცნიერო კუთხითაც(?!)”.
”სამხრეთის კარიბჭის” შეკითხვას, შეიქმნება თუ არა უხერხული ვითარება ხვალ ”ენერგო-პრო” და ახალციხის მუნიციპალიტეტის გამგეობა ერთმანეთს სასამართლოში რომ დაუპირისპირდეს, ან ვისი პოზიცია შეიძლება დაიკავოს იურისტმა, რომელიც ორივე სამსახურში მუშაობს, პარუნაშვილი გვპასუხობს, რომ თავად შეკითხვაა უხერხული: ”იურიდიულ მეცნიერებაში ასეთი რამ, რომ ვიღაცის მხარე დაიკავო, არ არსებობს. თან მე აქ იურისტი არ ვარ. უნდა დაიკავო კანონის მოთხოვნის მხარე. კანონიერების სადარაჯოზე უნდა ვიყოთ იურისტები. ეგრე შეიძლება კეთილგანწყობა გქონდეს რომელიმე კონკრეტული პირისადმი”.
პარუნაშვილი აცხადებს, რომ ”ენრგო-პრო ჯორჯიადან” წამოსვლას აპირებს, თუმცა, არა იმიტომ ,რომ კანონით შეუთავსებელია ორ სამსახურში ერთად მუშაობა, არამედ იმიტომ, რომ ასე თავად გადაწყვიტა: ” სამეცნიერო კუთხით ვაგრძელებ მუშაობას სისხლის სამართლში და ამდენ რამეს ერთად ვეღარ გავწვდები”.
კითხვაზე, იციან თუ არა მისი სამსახურების უფროსებმა და კოლეგებმა ის, რომ იგი ორ სამსახურში ერთად მუშაობს, პაუნაშვილი გვპასუხობს: ”რა თქმა უნდა, ეს ოფიციალურადაც ვაცნობე”
თუმცა, ”ენერგო-პრო ჯორჯიას” სამხრეთ საქართველოს ფილიალის დირექტორმა ბერდია გოგლოძემ ის, რომ მისი ფილიალის იურისტი ამავე დროს გამგებლის მრჩეველიც იყო, ჩვენგან შეიტყო. გოგლოძისგან განსხვავებით, ინფორმირებულია ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე.
”როგორც ვიცი ”ენერგო-პროშიც” ხელშეკრულებით მუშაობს, დარღევევაა რამე?! - კითხულობს ბლიაძე და ამატებს, რომ აქვს უფლება ხელშეკრულებით აიყვანოს თანამშრომელი თუ ამას თავად მიიჩნევს საჭიროდ - სამთვიანი ხელშეკრულებით გვყავს აყვანილი პარუნაშვილი. გვჭირდებოდა და იმიტომ ავიყვანეთ”.
გამგეობაში მრჩევლის სტატუსით თანამშრომლის აყვანის შესახებ უკვირთ სამოქალაქო კულტურის საერთაშორისო ცენტრის გამგეობის თავმჯდომარეს კოტე კანდელაკს და ინფორმაციის თავისუფლების განვითარების ინსტიტუტის გამგეობის თავმჯდომარეს ლევან ავალიშვილს.
”სამინისტროებში არის მრჩევლის შტატი და ის ოფიციალურად საჯარო მოხელედ ითვლება, მაგრამ თვითმმართველობებში მრჩევლის თანმდებობის შესახებ არ გამიგია. უნდა იყოს მაგალითად სპეციალისტი, უფროსი სპეციალისტი, ან რაიმე ასეთი”, - ამბობს კანდელაკი.
რაც შეეხება პარუნაშვილის განცხადებას, რომ იგი არ არღვევს კანონს, რადგან გამგეობის თანამშრომლად ხელშეკრულებითაა აყვანილი, ინფორმაციის თავისუფლების განვითარების ინსტიტუტის იურისტი ნინო ცუხიშვილი ამბობს, რომ ეს არაფერს ცვლის.
”არ აქვს მნიშვნელობა ხელშეკრულებითაა აყვანილი თუ ბრძანებითაა დანიშნული, რადგან საჯარო სამსახურშია ეს ადამიანი დასაქმებული”, - ამბობს ცუხიშვილი.
მისი თქმით, საჯარო სამსახურში დასაქმების ორი ფორმა არსებობს ერთი ხელშეკრულების და მეორე ბრძანების საფუძველზე: ”პარუნაშვილი საჯარო მოსამსახურის ფუნქციებს ასრულებს, ამიტომ არ აქვს უფლება, რომ იმუშაოს კერძო სექტორშიც და საჯარო სამსახურშიც”.
[თამუნა უჩიძე, ახალციხე]