ახალციხის თვითმმართველობის წევრთა შესარჩევი კომისია ცნობილია

ახალციხის თვითმმართველობაში კონკურსი 71 პოსტზეა გამოცხადებული. განაცხადების მიღების ვადა ხვალ, 20 დეკემბერს იწურება.
საკონკურსო კომისია კადრების შერჩევას ორ ეტაპად წარმართავს. პირველ ეტაპზე დასაქმების მსურველთა აპლიკაციებს განიხილავენ, მეორე ეტაპი კი გასაუბრება იქნება.

საკონკურსო კომისია 9 წევრისგან დაკომპლექტდა. კომისიაში ბიზნესსექტორის, უნივერსიტეტის, პროფკავშირების, მუნიციპალიტეტის საკრებულოსა და გამგეობის თანამშრომლები არიან.

საკონკურსო კომისიას ახალციხის მუნიციპალიტეტის საკრებულოს თავმჯდომარე ოლეგ სანდროშვილი ხელმძღვანელობს. საკრებულოს თავმჯდომარის მოადგილე მალხაზ ასპანიძე, თავმჯდომარის მოადგილის ფუნქციას ითავსებს საკონკურსო კომისიაშიც. კონკურსის დანარჩენი წევრები არიან: ახალციხის მუნიციპალიტეტის გამგებელის დროებით მოვალეობის შემსრულებელი ბესიკ ბლიაძე, ახალციხის მუნიციპალიტეტის საკრებულოს სამანდატო-საპროცედურო საკითხთა და ეთიკის კომისიის თავმჯდომარე ზურაბ ჭელიძე, საქართველოს საჯარო მოსამსახურეთა პროფესიული კავშირის, ასპინძის რაიონული ორგანიზაციის თავმჯდომარე მერი გიორგაძე, სამცხე-ჯავახეთის სახელმწიფო სასწავლო უნივერსიტეტის იურიდიული ფაკულტეტის დეკანის მოვალეობის შემსრულებელი მალხაზ ლომსაძე, ამავე უნივერსიტეტის ბიზნესის ადმინისტრირების ფაკულტეტის დეკანის მოადგილე გიორგი ბუცხრიკიძე, სასტუმრო „ლომსიას“ გენერალური დირექტორი ჟანპიერ მარსელ რიშტონი და სასტუმრო „ჯინო ველნნესის“ დირექტორი ნანა ბერიშვილი.

ახალციხის მუნიციპალიტეტის საკრებულოში განმარტავენ, რომ სასტუმროების მენეჯერებსა და სამცხე-ჯავახეთის სასწავლო უნივერსიტეტს კანდიდატების წარსადგენად წერილი თავად მისწერეს, ხოლო ასპინძის მუნიციპალიტეტის პროფკავშირებიდან საკონკურსო კომისიაში მონაწილეობის სურვილი თვითონ გამოთქვეს.

როგორც საკრებულოს თავმჯდომარე ოლეგ სანდროშვილი განმარტავს, კომისიის წევრობაზე უარი განაცხადეს არასამთავრობო ორგანიზაციის წარმომადგენლებმა. ისინი კონკურსის მიმდინარეობისას, მხოლოდ დამკვირვებლის როლში იქნებიან. კონკურსი 27 - 31 დეკემბერს ჩატარდება.

შეგახსენებთ, რომ კონკურსის ჩატარების შესახებ ახალციხის მუნიციპალიტეტში 2013 წლის ივლისში დააანონსეს. კონკურსის არჩევნებამდე ვერ ჩატარება მოუცლელობით ახსენენ, შემდეგ კი პროცესი არჩევნებმა შეაფერხა.

[თინათინ ზაზაძე, ახალციხე]