ახალციხის ადგილობრივ ხელისუფლებაში ყველა პოსტი ვაკანტურია

ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე ამბობს, რომ ამ ეტაპზე საკონკურსო კომისიის დაკომპლექტება მიმდინარეობს. უკვე ცნობილია, რომ კომისიის თავმჯდომარე ახალციხის მუნიციპალიტეტის საკრებულოს თავმჯდომარე ოლეგ სანდროშვილი იქნება.

„ერთ-ერთი წევრი აუცილებლად ვიქნები მეც, რადგან ჩემი თანამშრომლები უნდა შეირჩნენ“, - აცხადებს ბლიაძე და ამატებს, რომ კონკურსი გამგეობაში არსებულ ყველა შტატზე გამოცხადდება, თუმცა ჯერ დეტალები გარკვეული არ არის და ყველაფერი ცნობილი მას შემდეგ გახდება, როცა კომისია ჩამოყალიბდება.

შეგახსენებთ, რომ კონკურსის ჩატარების შესახებ ახალციხის მუნიციპალიტეტში მიმდინარე წლის ივლისში დააანონსეს. მოგვიანებით კი, ის რომ ამ დრომდე კონკურსი ვერ ჩატარდა, მოუცლელობით ახსნეს.

[თამუნა უჩიძე, ახალციხე]