როგორ არჩევენ კადრებს ახალციხის თვითმმართველობაში

ახალციხის ადგილობრივ თვიმმართველობაში შექმნილი საკონკურსო კომისია გამარჯვებულების გამოვლენას ხვალიდან, 31 დეკემბრიდან დაიწყებს. პირველ რიგში ეკონომიკისა და საფინანსო სამსახურის უფროსებს შეარჩევენ.

„საფინანსო სამსახურში შევარჩევთ რამდენიმე სპეციალისტსაც, რადგან ეს ისეთი სამსახურია, რომლის გაჩერებაც არ შეიძლება“, - ამბობს ახალციხის მუნიციპალიტეტის საკრებულოს თავმჯდომარე ოლეგ სანდროშვილი, რომელიც ამავდროულად საკონკურსო კომისიის თავმჯდომარეცაა.

547 განცხადებებიდან განსახილველად 238 დარჩა. 309-ს უარი იმ მიზეზით ეთქვა, რომ განმცხადებელთა ნაწილს დოკუმენტები აკლდა, ნაწილს კი ორი ან რამდენიმე ვაკანსია ჰქონდა მითითებული.

238 კაციდან გასაუბრებაზე, რომელიც შაბათ-კვირას, 29-30 დეკემბერს, დილის 10:00-დან საღამოს 10:00 საათამდე მიმდინარეობდა 207 კონკურსანტი გამოცხადდა. კონკურსანტებს ნაცვლად 9-კაციანი კომისიისა, 7 კაცი არჩევდა. გასაუბრებას კომისიის წევრები: სამცხე-ჯავახეთის სახელმწიფო სასწავლო უნივერსიტეტის იურიდიული ფაკულტეტის დეკანის მოვალეობის შემსრულებელი მალხაზ ლომსაძე და სასტუმრო „ლომსიას“ გერნერალური დირექტორი ჟანპიერ მარსელ რიშტონი არ ესწრებოდნენ
.
ყველაზე მეტი განცხადება კანცელარიის სპეციალისტებზე შევიდა. მოთხოვნა იყო კულტურის სამსახურში ტურიზმის მიმართულებითაც, მოთხოვნადი იყო გამგებლის მრჩევლის და გამგებლის პირადი მდივნის ვაკანსიებიც.

„იყო ვაკანსიები, სადაც მხოლოდ ერთი განაცხადი შემოვიდა, თუმცა რადგან მათ კონკურენტი არ ჰყავთ, ეს იმას არ ნიშნავს, რომ ავტომატურად ავირჩევთ“, - აცხადებს სანდროშვილი და ამატებს, რომ ასეთი სამი პოსტია.

მისი თქმით, კონკურსში მონაწილეობა ყველა თანამშრომელმა მიიღო: „ბევრი ნიჭიერი ახალგაზრდაც მოვიდა, ისეთები, სანთლით რომ ვეძებდთ, მაგრამ სამწუხაროდ, მათ განაცხადები იმ თანამდებობეზე არ ჰქონდათ შემოტანილი, სადაც რეალურად მათი საჭიროება დგას“.
მისივე თქმით, კონკურსში მონაწილეობდნენ ისეთი ახალგაზრდები, რომელთა ცოდნა და განათლების დონე არ შეესაბამებოდა მათივე წარმოდგენილ დიპლომებს.

საკონკურსო კომისიის 7-მა წევრმა 50-ქულიანი შეფასების სისტემის მიხედვით კონკურსანტები უკვე შეაფასა, ახლა მათ შესაჯერებლად და გამარჯვებულის გამოსავლენად უნდა იმსჯელონ. ამისთვის კომისია ხვალ, 31 დეკემბერს დილიდან შეიკრიბება და გამარჯვებულების გამოვლენას დაიწყებს. თუმცა, მანამდე მათ საპრეტენზიო კომისიაში შეტანილი საჩივრების განხილვა მოუწევთ.

„შესაძლოა შევცდით და ვინმეს დისკვალიფიკაცია არასწორად მივეცით, საპრეტენზიო კიმისიის გადაწყვეტილებას საჩივრის შესახებ განვიხილავთ და ამა თუ იმ პირზე ამის მიხედვით ვიმსჯელებთ“, - ამბობს სანდროშვილი და ამატებს, რომ საპრეტენზიო კიმისიისთვის მიმართვა კონკურსანტებს მას შემდეგაც შეეძლებათ, რაც გამარჯვებულებს გამოაცხადებენ.

თუ კონკურსანტები რომელიმე კანდიდატზე ვერ შეჯერდებიან და პოსტი ვაკანტური დარჩება, კონკურსს ასეთ თანამდებობაზე ხელახლა გამოაცხადებენ. სულ კი კომისია მუშაობას იანვრის მეორე კვირაში დაასრულებს.

[თამუნა უჩიძე, ახალციხე]