ახალციხელი ინფიცირებული ქალი სასწრაფომ კლინიკაში გადაიყვანა

პაციენტის ოჯახის წევრები აცხადებენ, რომ ექიმები მათთან 16:00 საათისთვის მივიდნენ: „როგორც გვითხრეს ადიგენის სასწრაფოდან იყვნენ, ჩემი დედამთილი წაიყვანეს, ჩვენ გაგვაფრთხილეს, რომ სახლიდან გარეთ არ გავიდეთ“.

64 წლის ქალს, რომელიც დიალეზზეა და რამდენიმე ქრონიკული დაავადება აქვს, კორონავირუსი გუშინ, 20 ოქტომბერს დაუდასტურდა.

ოჯახი გუშინდელი დღიდან ითხოვდა ინფიცირებულის კლინიკაში გადაყვანას. მათივე თქმით, გუშინ პაციენტი ასპინძის სასწრაფო სამედიცინო დახმარების ცენტრიდან ჩამოსულმა ჯგუფმა სახლიდან წაიყვანა, თუმცა მალევე უკან მოაბრუნა და უთხრა, რომ კლინიკებში ადგილი არ აქვთ.

„სამხრეთის კარიბჭე“ ბოლო რამდენიმე საათის განმავლობაში ცდილობს საგანგებო სიტუაციების კოორდინაციისა და გადაუდებელი დახმარების ცენტრთან დაკავშირებას, თუმცა უშედეგოდ. საზოგადოებასთან ურთიერთობის სამსახურმა კითხვები წერილობით გადაგვაგზავნინა, თუმცა არ გვიპასუხა.

ამ ეტაპზე უცნობია რომელ კლინიკაში გადაიყვანეს ინფიცირებული ქალი.

ცნობისთვის, მედპერსონალის კორონავირუსით დაინფიცირების გამო, ახალციხის სასწრაფო სამედიცინო დახმარების ცენტრი რამდენიმე დღით დაიხურა, ადგილობრივებს დროებით, ადიგენის და ასპინძის ჯგუფები ემსახურებიან.

ამ ეტაპზე რეგიონში:

კოვიდინფიცირებულია - 150 პირი;
გამოჯანმრთელდა - 39;
სახლში მკურნალობს - დაახლოებით 20;
თვითიზოლაციაშია - 627 პირი, აქედან:
ახალციხე - 346;
ახალქალაქი - 105;
ადიგენი - 60;
ასპინძა - 43;
ნინოწმინდა - 39;
ბორჯომი - 34;
საკარანტინო სივრცეებში - 551 პირია, მათგან:
ახალციხეში - 93;
ბაკურიანში - 458.

[sknews.ge]