ახალციხეს დროებით ასპინძის და ადიგენის სასწრაფოების ექიმები მოემსახურებიან

ახალციხის სასწრაფო სამედიცინო დახმარების ცენტრში კორონავირუსით 13 თანამშრომელია ინფიცირებული, ნაწილი კი მათთან კონტაქტის გამო საკარანტინო სივრცეებში იმყოფებიან.

საგანგებო სიტუაციების კორდინაციისა და გადაუდებელი დახმარების ცენტრის საზოგადოებასთან ურთიერთობის სამსახურში აცხადებენ, რომ ამ ეტაპზე ახალციხელ მოსახლეობას ადიგენის და ასპინძის ექიმები მოემსახურებიან.

„ახალციხეში ეკიპაჟის განთავსებაზე მიმდინარეობს მუშაობა. რაც შეეხება ახალქალაქს, აქ ადგილზე განვათავსეთ ნინოწმინდის ეკიპაჟი, საჭიროების შემთხვევაში კი მომიჯნავე მუნიციპალიტეტები დაეხმარებიან“, – აცხადებენ ცენტრის საზოგადოებასთან ურთიერთობის სამსახურში.

კორონავირუსის შემთხვევების მატების გამო, ახალციხის სასწრაფომ მუშაობა დღეს, 20 ოქტომბერს შეაჩერა, ახალქალაქმა კი გუშინ.

სამცხე–ჯავახეთში covid-19–ით ინფიცირების 131 შემთხვევაა გამოვლენილი.

[sknews.ge]