ახალციხეში კოვიდინფიცირებულთა უმრავლესობა მედპერსონალს უკავშირდება

ახალციხის სამედიცინო დაწესებულებებში მომუშავე კონკრეტულად რამდენი პირია ინფიცირებული, უცნობია, თუმცა მათი რიცხვი ათს აჭარბებს. COVID-19 დაუდასტურდათ, როგორც რეფერალური საავადმყოფოს, ასევე კლინიკა "იმედისა" და სასწრაფო-სამედიცინო დაწესებულების თანამშრომლებს.

სამცხე-ჯავახეთის სახელმწიფო რწმუნებულის აპარატის უფროსის გიორგი მიქელაძის განცხადებით, ამ დროისათვის ახალციხეში სამედიცინო დაწესებულებების სულ 13 თანამშრომელია ინფიცირებული.

თუმცა ამდენივეს ასახელებენ სასწრაფო-სამედიცინო დახმარების ცენტრალურ ოფისში და ამბობენ, რომ მხოლოდ ახალციხის სასწრაფოში ინფიცირებულია 13 ადამიანი, მათ შორის არიან ექიმები, ექთნები და მძღოლები.

გასათვალისწინებელია ისიც, რომ შესაძლოა რომელიმე სამედიცინო პირი ერთდროულად მუშაობდეს, როგორც კლინიკაში, ასევე სასწრაფო-სამედიცინო სამსახურში.

„ამ ეტაპზე სასწრაფოს ახალციხის ფილიალის მუშაობა არაა შეფერხებული. ყველა პირი, რომლებიც ეპიდემიოლოგების მიერ კონტაქტად იყო მიჩნეული, თვითიზოლაციასა და კარანტინში არიან გადაყვანილები. ინფიცირებულების მდგომარეობა არაა მძიმე და ისინი იმყოფებიან ექიმების მეთვალყურეობის ქვეშ“, - გვითხრეს სასწრაფო სამედიცინო დახმარების სამსახურში.

ამ დროისათვის, რეგიონში COVID-19-ით ინფიცირებული სულ 100 პირია მოკვლეული.

ადიგენის მუნიციპალიტეტი – 32 შემთხვევა;
ახალციხის მუნიციპალიტეტი – 32 შემთხვევა;
ნინოწმინდის მუნიციპალიტეტი – 19 შემთხვევა;
ახალქალაქის მუნიციპალიტეტი – 12 შემთხვევა;
ასპინძის მუნიციპალიტეტი – 4 შემთხვევა.

[მარიამ ბარძიმაძე]