‘სასწრაფომ ქალაქში ატარა და უკან მოიყვანა’ – ინფიცირებულის ოჯახი დახმარებას ითხოვს

64 წლის ქალს კორონავირუსი 20 ოქტომბერს დაუდასტურდა, აღნიშნულის შესახებ ოჯახის წევრებს ახალციხის რეფერალური ჰოსპიტალიდან შეატყობინეს.

„გუშინ 10:00 საათზე დაგვირეკეს, გვითხრეს კორონა აქვს თქვენს დედამთილს, სასწრაფო მალე მოვა და კლინიკაში გადაიყვანენო. სასწრაფოს მანქანა ასპინძიდან 12:00 საათისთვის მოვიდა, წაიყვანეს ჩემი დედამთილი, ატარეს ქალაქში და უკან მოიყვანეს, გვითხრეს კლინიკებში ადგილი არ არისო“, – გვიყვება ინფიცირებულის რძალი.

ოჯახის წევრების განცხადებით, ინფიცირებულ ქალს ტემპერატურა აღენიშნება, ასევე აქვს ქრონიკული დაავადებები, რის გამოც მისი მდგომარეობა შეიძლება ნებისმიერ დროს დამძიმდეს: „მეორე დღეა ყურადღებას არავინ გვაქცევს. დედამთილი დიალეზზეა, აქვს დიაბეტი და ფილტვებში წყალი, ასე როგორ შეიძლება?! უპატრონოდ დატოვეს ქალი, მასზე ვიფიქრო თუ ოჯახის სხვა წევრებზე აღარ ვიცი, ხუთნი ვართ სახლში“.

ინფიცირებული ქალი დიალეზზე ახალციხის რეფერალურ ჰოსიტალში დადიოდა, როგორც სამედიცინო დაწესებულებაში განგვიმარტეს, ასეთ პაციენტებს კორონავირუსზე ტესტირება 10 დღეში ერთხელ უტარდებათ. covid-19–ის დადასტურების შემთხვევაში რეაგირებისთვის შესაბამის უწყებებს ატყობინებენ.

„ეს ქალბატონი ჩვენთან მკურნალობს მხოლოდ დიალეზზე, მოდის და მიდის. მას გეგმიურად ჩაუტარდა ტესტირება, დაუდგინდა კორონავირუსი, ამ შემთხვევაში ჩვენი ვალდებულებაა შევატყობინოთ თავად ინფიცირებულს და საზოგადოებრივ ჯანდაცვას, მისი ტრანსპორტირება ჩვენი მოვალეობა არ არის. შესაბამისად ჩვენ არ ვართ კოვიდკლინიკა და ვერც მივხედავთ“, – აცხადებენ ჰოსპიტალში.

რატომ წაიყვანეს პაციენტი სახლიდან და რა მიზეზით დააბრუნეს უკან, ამის გასარკვევად „სამხრეთის კარიბჭე“ საგანგებო სიტუაციების კოორდინაციისა და გადაუდებელი დახმარების ცენტრს დაუკავშირდა.

„ვერ გპასუხობთ, კითხვები მოგვწერეთ“, – განგვიცხადეს საზოგადოებასთან ურთიერთობის სამსახურში.

რედაქცია პასუხს ჯერ კიდევ ელოდება.

[sknews.ge]