სამცხე-ჯავახეთის გუბერნატორი თანამდებობას ტოვებს

ინფორმაციას ტელეკომპანია "რუსთავი 2" ავრცელებს. 21:00 საათიან საინფორმაციო გამოშვებაში გასული სიუჟეტის თანახმად, საპრეზიდენტო არჩევნების შემდეგ გადადგომის შესახებ პრეზიდენტის კანცელარიას მიმართეს იმერეთის, ქვემო ქართლის და გურიის გუბერნატორებმაც.

ამ გადაწყვეტილებების შესახებ „ნაციონალური მოძრაობის“ პოლიტსაბჭოს სხდომის დასრულების შემდეგ გახდა ცნობილი. შეხვედრაზე, რომელსაც მიხეილ სააკაშვილი უძღვებოდა, საპრეზიდენტო არჩევნების შედეგები განიხილეს.

"სამხრეთის კარიბჭე" ამ დრომდე ცდილობდა ივანე წიკლაურთან დაკავშირებას, თუმცა, მისი ტელეფონი გამორთულია. სამხარეო ადმინისტრაციის თანამშრომლები ამ დროისთვის ინფორმაციას არ ფლობენ. გუბერნატორის სავარაუდო გადადგომის შესახებ ინფორმაცია არ აქვს არც მის მოადგილეს გელა დემეტრაძეს.

სამცხე-ჯავახეთის გუბერნატორად ივანე წიკლაური 2012 წლის 6 ივლისს დაინიშნა, მან გუბერნატორის პოსტზე ლაშა ჭკადუა შეცვალა, რომელსაც ეს პოსტი 2008 წლის 17 დეკემბრიდან ეკავა.

[sknews.ge]