სამცხე-ჯავახეთში გუბერნატორის მოვალეობას პირველი მოადგილე ასრულებს

სამცხე-ჯავახეთის მხარეში საქართველოს პრეზიდენტის რწმუნებულის მოადგილის გელა დემეტრაძის თქმით, ჰარუთიუნ ჰოვჰანესიანი სამცხე-ჯავახეთის გუბერნატორის მოვალეობას იქამდე შეასრულებს, ვიდრე ახალი გუბერნატორი დაინიშნება.

გელა დემეტრაძე ამბობს, რომ ახლო მომავალში გადადგომის შესახებ განცხადება შეიძლება გუბერნიის სხვა თანამშრომლებმაც დაწერონ.

„დრო მოვა და ჩვენც დავწერთ განცხადებებს. სავარაუდოდ გადადგომის შესახებ განცხადებას ახლო მომავალში დავწერ“, - განაცხადა გელა დემეტრაძემ.

შეგახსენებთ, რომ გადადგომის შესახებ პრეზიდენტის კანცელარიას გუბერნატორებმა არჩევნებიდან მეორე დღეს მიმართეს, მათი განცხადებები 15 ნოემბერს დაკმაყოფილდა.

სამცხე-ჯავახეთის გუბერნატორი ივანე წიკლაური თანამშრომლებს 14 ნოემბერს დაემშვიდობა.

[SKnews.ge]