27 ოქტომბერს საპრეზიდენტო არჩევნებში კოალიცია „ქართული ოცნების“ პრეზიდენტობის კანდიდატის გამარჯვების შემდეგ, 2 დღეში, სამცხე-ჯავახეთის გუბერნატორმა ივანე წიკლაურმა გადადგომის შესახებ პრეზიდენტის კანცელარიაში განცხადება შეიტანა.
„წიკლაურის განცხადება განსახილველად საკადრო სამსახურს 1 ნოემბერს გადაეცა, სხვა ჯერ არაფერია ცნობილი“, - განუცხადეს სატელეფონო საუბარში „სამხრეთის კარიბჭეს“ პრეზიდენტის კანცელარიიდან.
ვიდრე წიკლაურის განცხადებას დააკმაყოფილებენ, მომავალი გუბერნატორის ვინაობის შესახებ სხვადასხვა მოსაზრებები ვრცელდება.
არჩევნების ჩატარებამდე კულუარებში სამცხე-ჯავახეთში პრეზიდნეტის ყოფილი რწმუნებულის გელა კავარაცხელიას კანდიდატურას განიხილავდნენ. იგი გუბერნატორი 2003 წლის აგვისტოდან ნოემბრამდე იყო. სწორედ მისი გუბერნატორობის დროს აფეთქდა გუბერნიასთან ასაფეთქებელი მოწყობილობა, რის გამოც სამხარეო ადმინისტრაციის ინკასატორი თემურ ივანიძე დაშავდა. ამჟამად კვარაცხელია „ქართული ოცნების“ ცენტრალურ შტაბში აქტივის წევრია.
არჩევნების შემდეგ კი რეგიონში, და მით უფრო ახალციხეში, გუბერნატორის პოსტზე „ქართული ოცნების“ შტაბის უფროსს მალხაზ ჟუჟუნაძის კანდიდატურას მოიაზრებენ. რისი მიზეზიც გარკვეულწილად ისაა, რომ წინასაარჩევნოდ პრემიერ-მინისტრის ბიძინა ივანიშვილის უიმედო განწყობის ფონზე სამცხე-ჯავახეთში არჩევნების წაგებასთან დაკავშრებით, აქ მარგველაშვილმა ხმების უმრავლესობა მიიღო.
განცხადებას იმის შესახებ, რომ კვარაცხელია და ჟუჟუნაძე გუბერნატორებად მოიაზრებიან, ორივე მათგანი უარყოფს.
„ამის შესახებ სუბარი არ ყოფილა, თან კანონდმდებლობა მთლიანად იცვლება, ჯერ რა როგორ იქნება არავინ იცის. წარმოდგენა არ მაქვს საიდან გაჩნდა ეს მოსაზრება, ახლა ამის შესახებ არაფის თქმა არ შემიძლია, - ამბობს კვარაცხელია და ამატებს, - ისე კი მიხარია, რომ ჩემი სახელი რეგიონში დადებით კონტექსტში მოიაზრება".
მისი კანდიდატურა რომ გუბერნატორის პოსტზე მოიაზრება, დადებითი განწყობით ხვდება მალხაზ ჟუჟუნაძეც.
„ბავშვი არ დაბადებულა და აბრაამს არქმევდნენო“,- ნათვამია. ვერაფერს გეტყვით რა როგორ იქნება, მაგრამ თუ ვინმე გამოხატავს ნდობას ჩემს მიმართ, გამიხარდება. ჩემი მიზანია ქვეყანას ვემსახურო, თანამდებობისთვის არასდროს მიბრძოლია“, - აცხადებს ჟუჟუნაძე.
სანამ შტაბის უფროსად დაინიშნებოდა, იგი ახალციხის მუნიციპალიტეტის გამგებლის მოადგილე იყო: „შვებულება აგვისტოში ავიღე, დაახლოებით 12 ნოემბრისთვის ვადა მეწურება, თუ მანამდე რაიმე სხვა გადაწყვეტილებას არ მიიღებენ, ისევ ჩემ ძველ სამუშაო ადგილზე დავბრუნდები“.
კითხვაზე, გუბერნატორად მოსვლის შემთხვევაში, გუბერნიაში განხორციელდება თუ არა სკადრო ცვლილებაბი, რადგან აქ კადრების უმრავლესობა „ნაციონალური მოძრაობის“ მხარდამჭერია, გვპასუხობს: „თუ გუბერნატორი გავხდები, ვეტყვი ამ ადამიანებს, რომ თავიანთი შეხედულებებიდან გამომდინარე გადაწყვიტონ, ჩემთან ერთად გააგრძელებენ მუშაობას და გამოყვებიან იმ გზას, რომელსაც ჩვენი ხელისულფება ადგას თუ არა“.
როგორც უკვე აღვნიშნეთ, წიკლაურის გათავისუფლების შესახებ განცხადება ჯერ არ დაუკმაყოფილებიათ, ჯერ წინ პრეზიდენტის ინაუგურაცია და ასევე „ქართული ოცნების“ პარტიის ყრილობაც გველოდება. ამდენად, ის თუ ვინ იქნება გუბნერნატორი, მხოლოდ ვარაუდია.
[თამუნა უჩიძე ახალციხე]