შსს მცხეთა-მთიანეთის სამხარეო სამმართველოს უფროსი
გია მეტრეველი, შსს სამცხე-ჯავახეთის სამხარეო-მთავარი სამმართველოს ყოფილი უფროსი
რევაზ მუმლაძე, „ქართული ოცნების“ რეგიონული კოორდინატორი სამცხე-ჯავახეთში
გია კარკაძე, „ქართული ოცნების“ ახალციხის შტაბის უფროსი, ახალციხის მუნიციპალიტეტის გამგებლის მოადგილე
მალხაზ ჟუჟუნაძე და სამცხე-ჯავახეთის ყოფილი გუბერნატორი, "ქართული ოცნების" ცენტრალური შტაბის აქტივის წევრი
გელა კვარაცხელია - ეს იმ კანდიდატების ჩამონათვალია, რომელთაც ბოლო ორი თვეა ადგილობრივები პრეზიდენტის რწმუნებულის პოსტზე მოიაზრებენ.
პირველი კანდიდატი, რომელიც ამ პოსტზე დასახელდა, გელა კვარაცხელია იყო. კვარაცხელიას კანდიდატურა ჯერ კიდევ საპრეზიდენტო არჩევნებამდე, იქამდე სახელდებოდა, ვიდრე პრეზიდენტის ყოფილი რწმუნებული ივანე წიკლაური გადადგომის შესახებ დაწერდა განცხადებას. შეგახსენებთ, კვარაცხელია ერთხელ უკვე იყო რეგიონის გუბერნატორი, 2003 წლის აგვისტოდან ნოემბრამდე.
ბოლო პერიოდში კი ყველაზე აქტიურად პოსტზე
გია მეტრეველის კანდიდატურას განიხილავენ.
დღეს, 11 დეკემბერს, ახალციხეში გავრცელდა ინფორმაცია, რომ ვაკანტურ პოსტზე გია მეტრეველი დაინიშნა. "სამხრეთის კარიბჭემ" ინფორმაცია თავად მეტრეველთან გადაამოწმა. სატელეფონო საუბარში მეტრეველმა განაცხადა, რომ მცხეთაში აგრძელებს მუშაობას.
დასახელებული კანდიდატებიდან "სამხრეთის კარიბჭესთან" საუბარში ხუთივე კანდიდატი აცხადებს, რომ ოფიციალური შეთავაზება არ მიუღიათ. მალხაზ ჟუჟუნაძე და გელა კვარაცხელია, ფაქტს, რომ მათზე ადგილობრივები საუბრობენ, "სასიამოვნოდ მოსასმენად" აფასებენ.
"მიხარია, რომ ჩემი სახელი რეგიონში დადებით კონტექსტში მოიაზრება", - განუცხადა "სამხრეთის კარიბჭეს" გელა კვარაცხელიამ
მიმდინარე წლის 4 ნოემბერს. "ბავშვი არ დაბადებულა და აბრაამს არქმევდნენო. ვერაფერს გეტყვით, რა როგორ იქნება, მაგრამ თუ ვინმე გამოხატავს ნდობას ჩემს მიმართ, გამიხარდება", - ასეთი იყო მალხაზ ჟუჟუნაძის შეფასება ასევე 4 ნოემბერს ჩაწერილ ინტერვიუში.
რაც შეეხება დანარჩენ სამ კანდიდატს, რევაზ მუმლაძეს, გია მეტრეველსა და გია კარკაძეს, სამივე მათგანი კატეგორიულად ირწმუნება, რომ პოსტზე არ მოიაზრებიან.
'ტყუილია, ტყუილი', - განაცხადა რევაზ მუმლაძემ დღეს, 11 დეკემბერს "სამხრეთის კარიბჭესთან" სატელეფონო საუბარში.
გია კარკაძემ დღეს კიდევ ერთხელ განუცხადა "სამხრეთის კარიბჭეს", რომ მასზე საუბარი არ ყოფილა. თუმცა, გია კარკაძემ აღნიშნა, რომ მისი ინფორმაციით, პოსტზე მეტრეველს განიხილავენ.
„მე სხვა ინფორმაცია მაქვს, მეტრეველზე რომ არის საუბარი ვიცი. მაგრამ მე შემოთავაზება არავისგან მიმიღია, არ ვარ ახალციხეში, მომავალ კვირას ჩამოვალ და გავარკვევ რა ხდება“, - განაცხადა კარკაძემ.
კიდევ ერთი სახელი, რომელიც რწმუნებულის პოსტზე რამდენიმე დღის წინ დასახელდა, ადიგენის მკვიდრი, ბათუმის ფარმაცევტული ქარხნის შპს "ბიოპოლუსის" 90% წილის მფლობელი ბიზნესმენი
გელა ობოლაშვილია.
„მე და გუბერნატორი?! მე მთელი ცხოვრება ბიზნესმენი ვიყავი, სახელმწიფო სამსახურში არასოდეს მიმუშავია და არც მიფიქრია ამ თემაზე. ამიტომ გეტყვით გულახდილად, რომ ჩემ ბიზნესში დავრჩები და ყოველთვის ბიზნესში ვიქნები. არ მხიბლავს სახელმწიფო სამსახური. პატრიოტული გრძნობებიდან გამომდინარე, სახელმწიფოს სამსახურში ვიქნები, მაგრამ როგორც ასეთი, გუბერნატორობა, არც მიფიქრია და არც ვფიქრობ მომავალში“, - განაცხადა გელა ობოლაშვილმა სატელეფონო საუბარში.
ვინ შეიძლება დაიკავოს სამცხე-ჯავახეთის რწმუნებულის პოსტი, ინფორმაცია ამ ეტაპზე არ აქვთ არც სამხარეო ადმინისტრაციაში.
სახელმწიფო რწმუნებულის-გუბერნატორის ადმინისტრაციის ადმინისტრციული სამსახურის უფროსის გიორგი მიქელაძის განმარტებით, გუბერნატორის დანიშვნის შესახებ ჯერ მთავრობამ უნდა მიიღოს გადაწყვეტილება, შემდეგ კი რწმუნებულის აპარატს წერილობით შეატყობინოს. მათთან აღნიშნული წერილი ჯერ არ შესულა.
„ჩვენ არ მიგვიღია არანაირი ინფორმაცია. ჩვეულებრივად ვაგრძელებთ მუშაობას", - გვითხრა სახელმწიფო რწმუნებულის-გუბერნატორის
მოადგილემ გელა დემეტრაძემ.
შეგახსენებთ, სამცხე-ჯავახეთში სახელმწიფო-რწმუნებულმა, გუბერნატორმა ივანე წიკლაურმა გადადგომის შესახებ განცხადება საპრეზიდენტო არჩევნებიდან მეორე დღეს,
28 ოქტომბერს დაწერა. მისი განცხადება
15 ნოემბერს დაკმაყოფილდა. ამ დრომდე რწმუნებულის მოვალეობას ყოფილი რწმუნებულის პირველი მოადგილე
ჰარუთიუნ ჰოვჰანესიანი ასრულებს.
[თამარ თოთაძე, ახალციხე]