ოქტომბრიდან ახალციხეში საბავშვო ბაღების თანამშრომლებს ხელფასები მოემატებათ

ფოტო: ახალციხის სკოლამდელი აღზრდის დაწესებულებათა გაერთიანება

ახალციხის მუნიციპალიტეტის ბაღების გაერთიანების ხელმძღვანელის, მარინა მერაბიშვილის თქმით, მომატებულ ხელფასს ბაღების თანამშრომლები ახალი სასწავლო წლიდან მიიღებენ: „ჩვენ მერიასთან შეთანხმებით განვსაზღვრეთ დრო ახალი სასწავლო წლიდან, 1-ელი ოქტობრიდან დაემატება ყველა თანამშრომელს 5%-დან 30%-მდე ხელფასი“.

მისივე თქმით, ხელფასების ზრდის პროცენტული მაჩვენებელი ასეთია:

მენეჯერებს დაემატებათ ხელფასის დაახლოებით 10%;
მნეებს 20%-მდე;
მუსიკის პედაგოგებს 20%-მდე;
სპეც. აღმზრდელებს - 10%-მდე;
აღმზრდელებს - 20%-მდე;
აღმზრდელის თანაშემწეებს - 25%-მდე;
მზარეულებს 20%-მდე;
ექთნებს - 30%-მდე;

პროცენტული განსხვავება იქნება დიდი და მცირე ბაღების თანამშრომლებისათვის: „ქალაქში გვყავს ორჯგუფიანი, სამჯგუფიანი, ათ ჯგუფიანი ბაღები და ამიტომ განვსაზღვრეთ დიდი და პატარა ბაღები. 6 და 6-ზე მეტი ჯგუფები სადაც არის, მათთვის განსხვავებული ხელფასებია. მცირე ბაღების მენეჯერებს ხელფასის 5% დაემატებათ. ასევე განსხვავებული იქნება ექთნების, დამლაგებლების, მნეების, მუსიკის მასწავლებლების ხელფასები ქალაქის მცირე ბაღებში“, - ამბობს მარინა მერაბიშვილი.

საბავშვო ბაღებში ხელფასების ზრდასთან დაკავშირებით, საქართველოს პრემიერ-მინისტრმა გიორგი გახარიამ ზუსტად ერთი წლის წინ განაცხადა. მისი თქმით, 2020 წლის ბიუჯეტიდან საბავშვო ბაღების მასწავლებლების ხელფასები 100 ლარით უნდა გაზრდილიყო.

[თაკო ფეიქრიშვილი]