ნინოწმინდის ბაღების გაერთიანებას ახალი ხელმძღვანელი ჰყავს

რადიო „ნორის“ ინფორმაციით, ბაღების გაერთიანების დირექტორის მოვალეობის შემსრულებელი მარინა ესოაიანი 10 წელია, რაც ნინოწმინდის საბავშვო ბაღში მუშაობს.

ესოიანი, რამდენი ხნის განმავლობაში იქნება, ბაღების გაერთიანების დირექტორის მოვალეობის შემსრულებელი უცნობია.

„ვიმუშავებ რამდენ ხანსაც საჭირო იქნება და საკუთარ ძალებს არ დავიშურებ“,–აცხადებს მარინა ესოიანი.

ნინოწმინდის საბავშო ბაღებში ამდროისათვის სასწავლო პროცესი არ მიმდინარეობს. ბაღებში, პირველი აგვისტოდან, პირველ სექტემბრამდე არდადეგებია.

ნინოწმინდის ბაღების გაერთიანების დირექტორი და მისი ბუღალტერი, ფინანსთა სამინისტროს საგამოძიებო სამსახურმა, თანხების მითვისებასა და გაფლანგვისათვის, 19 ივლისს პასუხისგებაში მისცა, სასამართლომ კი ორივე მათგანი გირაოთი გაათავისუფლა.

ბაღების გაერთიანების დირექტორმა ნარინე გინოსიანმა, პირველად „სამხრეთის კარიბჭესთან“ განაცხადა, რომ მის წინააღმდეგ დაწყებულ ძიებას, ნინოწმინდა–ახალქალაქის დეპუტატ ენზელ მკოიანს უკავშირებდა, რადგან მკოიანი მასთან ინტიმური კავშირის დამყარებას ცდილობდა, რაზეც უარი მიიღო და დაემუქრა.

გინოსიანისა და მკოიანის საქმეს, არასამთავრობო ორგანიზაციები და სახალხო დამცველის აპარატი სწავლობენ.

[ლუბა გიორგაძე, ნინოწმინდა]