ახალციხის თემის საბავშვო ბაღები ზაფხულში არ დაისვენებენ

ააიპ „ახალციხის თემის სკოლამდელი აღზრდის დაწესებულების“ დირექტორის ლელა ზაზაძის თქმით, საბავშვო ბაღებში საზაფხულოდ სწავლა არ შეწყდება, თუმცა პერსონალი შვებულებით ისარგებლებს.

„უწყვეტად ვიმუშავებთ შერეულ ჯგუფებთან“, - ამბობს ლელა ზაზაძე.

ახალციხის თემში 11 საბავშვო ბაღია, სადაც 700-მდე აღსაზრდელი ირიცხება. „ახალციხის თემის სკოლამდელი აღზრდის დაწესებულებაში“ ამბობენ, რომ ბაღებში განაცხადების მიღება, ბავშვების მისაღებად, მთელი ზაფხულის განმავლობაში გაგრძელდება.

ლელა ზაზაძის თქმით, სოფლებში: ფერსაში, წნისსა და საძელში, სავარაუდოდ, სექტემბრიდან ახალი საბავშვო ბაღები გაიხსნება.

„სამუშაოები სამივე ბაღში მიმდინარეობს. თუ რაიმე პროცედურულმა სამუშაოებმა ხელი არ შეგვიშალა, სექტემბრიდან სწავლას დავიწყებთ“, - ამბობს ლელა ზაზაძე.

წნისში, საძელსა და ფერსაში საბავშვო ბაღების მშენებლობაში ადგილობრივი ბიუჯეტიდან და „სოფლის მხარდაჭერის პროგრამის ფარგლებში“ ჯამში 195.053 ლარი დაიხარჯება.

[ლუბა გიორგაძე, ახალციხე]