სამცხე–ჯავახეთში 2 საკარანტინო ზონა გაუქმდა

სამცხე–ჯავახეთში საკარანტინო ზონების რაოდენობა ოთხამდე შემცირდა, ბაკურიანში 14 დღიან სავალდებულო კარანტინს მოქალაქეები ხუთის ნაცვლად სამ სასტუმროში გაივლიან.

დღევანდელი მონაცემებით, კარანტინში მყოფი 181 მოქალაქედან 11 ახალციხეში სასტუმრო „გრანდ პალასშია“ განთავსებული, ხოლო 170 მოქალაქე ბაკურიანის სამ სასტუმროშია გადანაწილებული.

ახალციხეში „ცხელების ცენტრის“ გაუქმების შემდეგ საეჭვო პაციენტები გორისა და თბილისის კოვიდკლინიკებში გადაჰყავთ.

20 ივნისს ახალციხის და ბაკურიანის საკარანტინო სივრცეებში კორონავირუსი ორ მოქალაქეს დაუდგინდა. ორივე მათგანი უკვე გადაყვანილია სამედიცინო დაწესებულებაში.

„ჩვენთან სასტუმროში ერთ პირს დაუდასტურდა კორონავირუსი, შუახნის კაცია, რომელიც დადასტურების შემდეგ გორის ჰოსპიტალში გადავიყვანეთ“, – განგვიცხადეს ახალციხის საკარანტინო ზონაში.

რაც შეეხება თვითიზოლაციას, ამ ეტაპზე რეგიონის მასშტაბით სულ სამი მოქალაქე იმყოფება. სამივე მათგანი ახალციხეში სავალდებულო თვითიზოლციის რეჟიმშია.

საქართველოში – 22 ივნისის მონაცემებით, კორონავირუსის 908 შემთხვევაა დადასტურებული, 761 პაციენტი გამოჯანმრთელდა. გარდაიცვალა 14, კარანტინის რეჟიმში 2 662 პაციენტი იმყოფება, ხოლო სტაციონალური მეთვალყურეობის ქვეშ 255.

[ნუკა სტეფნაძე, ახალციხე]