ახალციხეში კარანტინში მყოფ ქალს COVID-19 დაუდასტურდა

ახალციხის ჯანდაცვის ცენტრის ინფექციონისტი, ქეთევან ჯინჭველაძე ამბობს, რომ მოქალაქე საკარანტინო სივრცეში ექვს ივლისს მოათავსეს.

„ლარსიდან შემოიყვანეს ჩვენს საკარანტინო ზონაში. სავალდებულო სინჯი ავუღეთ კარანტინიდან გასვლამდე ერთი დღით ადრე. გუშინ ვირუსი დაუდასტურდა და გუშინვე გადავიყვანეთ კოვიდკლინიკაში“, – ამბობს ქეთევან ჯინჭველაძე.

მისი თქმით, ქალს, რომელსაც ვირუსი დაუდასტურდა სასტუმროს ნომერში მარტო იმყოფებოდა და არც გარშემომყოფებთან არ ჰქონია შეხება.

სამცხე–ჯავახეთში ამ დროისთვის კარანტინში სულ 241 მოქალაქე იმყოფება, აქედან 24 ახალციხეში სასტუმრო „გრანდ პალასშია“ მოთავსებული, ხოლო დანარჩენი 214 პირი ბაკურიანის სამ სასტუმროშია გადნაწილებული. ბოლო 10 დღის განმავლობაში ბაკურიანში კორონავირუსის შემთხვევა არ დაფიქსირებულა.

რაც შეეხება თვითიზოლაციას, რეგიონის მასშტაბით ხუთი პირია, ერთი ახალციხეში, ხოლო ოთხი ასპინძაში.

ჯანდაცვის ცენტრის ხელმძღვანელი მზია პაპაშვილი ამბობს, თვითიზოლაციაში მყოფები ასპინძელები არიან და ისინი სომხეთიდან შემოვიდნენ.

„ჩვენთან თვითიზოლაციაში ოთხი მოქალაქეა, თუ არ ვცდები ორი დღის წინ შემოვიდნენ სომხეთიდან. ტესტები გაიკეთეს და ვირუსი არ აქვთ, ნებართვა მიიღეს და 14 დღიან სავალდებულო კარანტინს სახლში გადიან“, – ამბობს მზია პაპაშვილი.

სამცხე–ჯავახეთში „ცხელების ცენტრების“ გაუქმების შემდეგ, პაციენტები ვირუსის დადასტურების შემდეგ გორის ან თბილისის კოვიდკლინიკებში გადაჰყავთ.

[ნუკა სტეფნაძე]