ახალციხეში თვითიზოლაციაში 12 მოქალაქე იმყოფება

დღევანდელი მონაცემებით, კარანტინში მყოფი 378 მოქალაქედან 115 ახალციხეში, სასტუმრო „გრანდ პალასშია“ განთავსებული, ხოლო 263 მოქალაქე ბაკურიანის ხუთ სასტუმროშია გადანაწილებული.

თვითიზოლაციაში რეგიონში17 პირი იმყოფება, აქედან 12 ახალციხეშია, ხოლო ხუთი ადიგენში, როგორც ადიგენის საზოგადოებრივ ჯანდაცვის ცენტრში აცხადებენ, ხუთივე მათგანი ადგილობრივია, ისინი ბოლო პერიოდში სვანეთში იმყოფებოდნენ და დაბრუნების შემდეგ თვითიზოლაციაში არიან.

„სვანეთიდან ჩამოვიდნენ ადგილობრივები, მათ ვირუსისთვის დამახასიათებელი არანაირი სიმპტომი არ აღენიშნებათ, თავს კარგად გრძნობენ, ამ ეტაპზე ტესტის გაკეთებას არ საჭიროებენ. ისეთი სამსახურის თანამშრომლები არიან, რომ ტესტი ჩატარებული აქვთ. თვითიზოლაციის დასრულებამდე გავუკეთებთ სავალდებულო ტესტს“,– განგვიცხადეს ადიგენის საზოგადოებრივ ჯანდაცვის ცენტრში.

12 პირი იმყოფება სავალდებულო თვითიზოლაციაში ახალციხეში. „სამხრეთის კარიბჭე“ დაუკავშირდა ახალციხის საზოგადოებრივი ჯანდაცვის ცენტრის ხელმძღვანელს ფატი (ნაირა) ხაბულიანს, თუმცა მან ჩვენს სატელეფონო ზარებს არ უპასუხა.

13 აგვისტოს მონაცემებით, საქართველოში კორონავირუსის შემთხვევათა რაოდენობა 1 283–მდე გაიზარდა, ინფიცირებული პაციენტებიდან 1 068 გამოჯანმრთელდა, მათ შორის 17 გარდაიცვალა, ამ დროის მონაცემებით კარანტინის რეჟიმში იმყოფება 7 635 მოქალაქე.

[ნუკა სტეფნაძე]