რეგულაციების შესრულებაზე კონტროლის გამკაცრებაა საჭირო – მარინა ეზუგბაია

როგორც, ეზუგბაია ამბობს ამ ეტაპზე საქართველოში „კოვიდცენტრებში“ 421 პაციენტი მკურნალობს, მათგან სამის მდგომარეობა კრიტიკულია, 17 პაციენტის მდგომარეობა კი მძიმე.

„დღეს გვაქვს 44 ახალი დადასტურებული შემთხვევა, აქედან 12 გახლავთ ბათუმთან დაკავშირებული, 12–ია დადასტურებულ შემთხვევასთან კონტაქტი, 2 ეპიდკერაში მოგზაურობის მქონე პირია, 5 შემოტანილი შემთხვევა, 3 სამედიცინო პერსონალია და ასევე 3 შემთხვევაზე გრძელდება წყაროს დადგენა“, – განაცხადა ეზუგბაიამ.

მისი თქმით, ინფიცირების მატებასთან დაკავშირებით, საჭიროა ქვეყანაში არსებულ რეგულაციებზე კონტროლის გამკაცრება.

„გუშინდელი მონაცემებით 45 და დღევანდელი 44 შემთხვევა მიუთითებს, რომ გარკვეულწილად ქვეყანაში ვირუსის მატებაა, რაც ითხოვს არსებული რეგულაციების კონტროლს და შესრულებას. ის რაც არსებობს დისტანცია, პირბადის ტარება, პირადი ჰიგიენა, ეს უნდა გამკაცრდეს, ეს არ ნიშნავს იმას, რომ ზოგადად ქვეყანაში რეგულაციები გამკაცრდეს“, – განაცხადა ეზუგბაიამ.

დღევანდელი მონაცემებით, ქვეყანაში ინფიცირების შემთხვევათა რაოდენობა 1 773–მდე გაიზარდა, გამოჯანმრთელდა სულ 1 325 პაციენტი. გარდაცვლილია 19 პაციენტი.

[ნუკა სტეფნაძე]