ახალციხეში მცირეწლოვანს მოტოციკლი დაეჯახა

შემთხვევა დღეს, 6 სექტემბერს დაახლოებით 16:00 საათზე მოხდა. როგორც „სამხრეთის კარიბჭესთვის“ გახდა ცნობილი, მოტორბოლა რაბათთან ახლოს, გორაზე გაიმართა.

„7 წლისაა ბავშვი, ამ შეჯიბრებაზე იყო, მაყურებლად. როგორც თქვეს, თავზე გადაუარა მოტოციკლმა, მძიმედ არისო“, – ამბობენ ადგილობრივები.

ბაიკერების შეჯიბრებაში მონაწილეობას მთელი ქვეყნის მასშტაბით, სხვადასხვა კლუბი იღებდა.

„ზუსტად რა მოხდა არ ვიცი, მე მაღლა ვიყავი, ეს მოხდა სტარტთან. ეს ბიჭი თბილისელია, ვინც დაეჯახა და ბავშვი ახალციხელია. საქართველოს მასშტაბით იყო შეჯიბრი“, – ამბობს თვითმხილველი.

დაშავებული ახალციხის რეფერალურ ჰოსპიტალში შეიყვანეს. საავადმყოფოში ამბობენ, რომ მდგომარეობა მძიმეა: „პოლიტრავმა აქვს. კრიტიკური მდგომარეობაა. ახლა მართვით სუნთქვაზე იმყოფება და ველოდებით კატასტროფას, რომ თბილისში გადავიყვანოთ“, – განმარტავენ რეფერალურ საავადმყოფოში.

შინაგან საქმეთა სამინისტრომ მომხდარზე ძიება სსკ-ის 276–ე მუხლის მეორე ნაწილით დაიწყო, რაც გულისხმობს ავტომობილის მოძრაობის უსაფრთხოების ან ექსპლუატაციის წესის დარღვევას, რამაც ჯანმრთელობის ნაკლებად მძიმე დაზიანება გამოიწვია.

[თაკო ფეიქრიშვილი]