‘მკოიანს ახლობლის გატაცებით დაემუქრნენ, კიდევ 5 მილიონს ითხოვენ’ – ადვოკატი

ტარიელ მურმანიშვილის განცხადებით, დეპუტატს, ბოლოს 30 აგვისტოს დაუკავშირდნენ: „ურეკავენ და რუსულად ეუბნებიან, აპირებს, თუ არა მათ მიერ მოთხოვნილი თანხის გადახდას. საუბარია 5 მილიონ ამერიკულ დოლარზე. მას პირდაპირ უთხრეს, თუ არ გადაიხდის თანხას მის საყვარელ ადამიანს წაიყვანენ და მას ვეღარ ნახავს. ასევე ეუბნებიან, რომ ისინი არ ხუმრობენ, რადგან უკვე მისი ძმის მანქანა ააფეთქეს და აღნიშნული თანხის გადახდას ერთი კვირის ვადაში სთხოვენ," - აცხდებს ადვოკატი.

მისივე თქმით, საქმესთან დაკავშირებით გამოძიება არაეფექტურად მიმდინარეობს: „გამოძიება არის ინერტული, არაფერს აკეთებს. დღემდე არ დაუკითხავთ ენზელ მკოიანი. ის არც დაზარალებულად არის ცნობილი. არ ვიცით რა ხდება საქმის მასალებში, წვდომა არ გვაქვს. წარმოიდგინეთ, გენერალურ პროკურორს სთხოვს ადამიანი, რომ ამოიღოს სამცხე-ჯავახეთის სამხარეო პოლიციიდან ეს საქმე და აიყვანოს პირად კონტროლზე, რადგან მასზე ხორციელდება თავდასხმები, მაგრამ ყურადღებას არავინ აქცევს. საქმე არის თაროზე შემოდებული“, - განაცხადა ტარიელ მურმანიშვილმა.

მკოიანის მიმართ მუქარის შესახებ ადვოკატმა პირველად, 10 აგვისტოს განაცხადა, მაშინ მურმანიშვილი ამბობდა, რომ დეპუტატს სიცოცხლის მოსპობით დაემუქრნენ და პოლიტიკიდან წასვლას და 5 მილიონ დოლარს ითხოვდნენ.

მკოიანზე სავარაუდო მუქარის საქმეზე შინაგან საქმეთა სამინისტროს გამოძიება სისხლის სამართლის კოდექსის 181–ე მუხლის მეორე ნაწილის „გ“ ქვეპუნქტით მიმდინარეობს, რაც დიდი ოდენობით ქონების მიღების მიზნით გამოძალვას გულისხმობს, რასაც ერთვის დაზარალებულის ან მისი ახლო ნათესავის მიმართ ძალადობის გამოყენების ან მათი ნივთის განადგურების ან დაზიანების, ანდა მათთვის სახელის გამტეხი ცნების გახმაურების ან სხვა ისეთი ცნობის გავრცელების მუქარა, რომელმაც შიძლება არსებითად დააზიანოს მათი უფლებები.

[რობი ზარიძე]