სოფლის ექიმების ხელფასი 700 ლარამდე გაიზრდება

ეთერ მერაბიშვილი 1999 წლიდან ახალციხის მუნიციპალიტეტის სოფლების: აგარის, საყუნეთის, ზიკილიის, წინუბნისა და გურკელის მოსახლეობას ემსახურება. 2010 წლიდან ფიზიკურ პირად დარეგისტრირდა, ოჯახის ექიმის სტატუსი მიიღო და მუშაობა ახალი პროგრამითა და დაფინანსებით გააგრძელა.

ახალციხიდან სოფელ აგარაში ყოველდღე ავტობუსით მიდის და ტრანსპორტში დღეში 3.00 ლარამდე ეხარჯება. გარდა ამისა, ზამთრის სეზონზე, როცა ვირუსული ინფექციები მატულობს, სხვა სოფლებში ხშირად ფეხით უწევს სიარული.

„გარდა იმისა, რომ ტრანსპორტში გვეხარჯება ანაზღაურების ნაწილი, მედიკამენტებს ჩვენ ვყიდულობთ და კომუნალურებსაც ჩვენ ვიხდით", - ამბობს იგი და ამატებს, რომ რამდენიმე დღის წინ საკუთარი სახსრებით შეშის ყიდვაც მოუწიათ.

სოფლის ექიმის ხელფასი 500, ექთნის კი 350 ლარია.

„ხელფასიდან 20 პროცენტს საშემოსავლოს ვიხდით, ფაქტობრივად ხელზე 280 ლარს ვიღებთ. ამ თანხიდან საკმაოდ ხშირად ვყიდულობ მედიკამენტებსაც. როცა პაციენტთან მიდიხარ, მას იმედი აქვს, რომ უშველი, ამიტომ წამლის გარეშე ვერ მიხვალ“, - ამბობს ხათუნა დეკანოიძე, რომელიც სოფელ საყუნეთის ექთანია და ხელფასს 350 ლარს იღებს.

ახალციხის მუნიციპალიტეტის 47 სოფელს 44 ოჯახის ექიმი და ექთანი ემსახურება. სამედიცინო დაწესებულება კი მხოლოდ სოფლებში: აწყურში, აგარაში, მუგარეთში, კლდეში, სხვილისში, ვალეში, ანში, პამაჯში, წყალთბილაში, ნაოხრებში, საძელში, მინაძეში, ურაველსა და მუსხში ფუნქციონირებს.

მიუხედავად იმისა, რომ ამბულატორია ყველგან არაა, ოჯახის ექიმი ყველა სოფელს ემსახურება. ხუთ სოფელს ერთი ექიმი ჰყავს და ყველა ექიმი ანალოგიური პრობლემეის წინაშეა.

შრომის, ჯანმრთელობისა და სოციალური დაცვის მინისტრის დავით სერგეენკოს განცხადებით, უახლოეს მომავალში სოფლის ექიმების ხელფასი 30%–ით გაიზრდება. ამასთან, მინისტრის თქმით, სოფლის ექიმებს აღარ მოუწევთ საკუთარი ხელფასიდან იჯარის, საკანცელარიო და კომუნალური ხარჯების გადახდა.

„დიდი ხანია დავასრულეთ გეგმა, რომელიც მოიცავს სოფლის ექიმების და რეგიონული სასწრაფო დახმარების სამსახურების ერთიან მართვის მოდელს. ამ მოდელის მიხედვით, სოფლის ექიმებს ხელფასი ექნებათ ხელფასად. ჩვენი გათვლებით, დაუყონებლივ იქნება შესაძლებელი მათი ხელფასების მინიმუმ 30%–ით გაზრდა და ის რასაც ხარჯავენ საკანცელარიო ნივთების შესაძენად, მედიკამენტებში, კომუნალურ გადასახადებში, თვითონ აღარ დახარჯავენ. რაც სჭირდება სოფლის ამბულატორიის ფუნქციონირებას, ამაზე ჩვენ ვიზრუნებთ“, – განაცხადა მინისტრმა.

სოფლის ექიმებს ჯანდაცვის სამინისტროს ინიციატივა მოსწონთ და ამბობენ, რომ თუ სამინისტრო ამბულატორიებს მედიკამენტებით უზრუნველყოფს და კომუნალური გადასახადებს დაფარავს, მაშინ მათი მდგომარეობა საგრძნობლად გაუმჯობესდება.

[მანანა სარაშვილი, ახალციხე]