სოფლის ექიმებს მედიკამენტების საკუთარი სახსრებით შეძენა აღარ მოუწევთ

სხდომაზე, რომელიც ჯანდაცვის სამინისტროში გაიმართა, ჯანდაცვის მინისტრი დავით სეერგეენკო და მისი მოადგილე მარიამ ჯაში, სოფლის ექიმებს შეხვდნენ. სხდომაზე რამდენიმე საკითხი განიხილეს. მათ შორის, სოფლის ექიმების დაფინანსების თემაც. სადაზღვევო კომპანიების სახელფასო დავალიანებების საკითხზე, სოფლის ექიმთა უმეტესმა ნაწილმა განაცხადა, რომ პრობლემა მოგვარებულია.

განსახილველ საკითხთა შორის იყო სოფლის ამბულატორიების იურიდიული სტატუსიც. ამ თემასთან დაკავშირებით საგანგებო სიტუაციების კოორდინაციისა და რეჟიმის დეპარტამენტის წარმომადგენლებმა პრეზენტაცია გამართეს სახელწოდებით: „პირველადი ჯანდაცვა სოფლად“. მასში ასახული იყო მონიტორინგის შედეგად გამოვლენილი სოფლის ამბულატორიების პრობლემები.

მინისტრის მოადგილის მარიამ ჯაშის განცხადებით პირველ რიგში ინფრასტრუქტურული პრობლემები მოგვარდება და სოფლად 81 ამბულატორია აშენდება, რომელიც აღიჭურვება შესაბამისი ტექნიკით. მოგვარდება სოფლის ამბულატორიების იურიდიული სტატუსის საკითხიც. ექიმებს აღარ მოუწევთ საკუთარი სახსრებით იზრუნონ მედიკამენტების შეძენასა და კომუნალური გადასახედების გადახდაზე. ამ ყველა პრობლემის გასაჭრელად უკვე არსებობს ორი სამუშაო ვარიანტი, რომელიც საკოორდინაციო საბჭოზე უკვე განიხილეს.

მარიამ ჯაშმა, სოფლის ექიმებებს 2014 წლის 1 იანვრიდან რეცეპტების სისტემაზე გადასვლის დეტალებიც გააცნო. ასევე განუმარტა ინფორმაცია სამინისტროს მიერ დასამტკიცებელი ახალი პროტოკოლების შესახებ.

[sknews.ge]