რაში დახარჯავს ახალციხის მერია მომავალ წელს ფულს – ბიუჯეტის განხილვა

მერიის ინფორმაციით, ბიუჯეტის განხილვა დაგეგმილია, 15:00 საათზე, შალვა ახალციხელის №2 -ში, ახალციხის მუნიციპალიტეტის ადმინისტრაციული შენობის პირველ სართულზე, სხდომათა დარბაზში. ბიუჯეტის განხილვაზე დასწრება ნებისმიერ დაინტერესებულ პირს შეუძლია.

შეგახსენებთ, დღეს დილით ბიუჯეტის განხილვა იყო ადიგენშიც, ახალციხის თემმა კი ბიუჯეტის პროექტის განხილვა უკვე მოაწყო.

ბიუჯეტის პროექტების მიხედვით, მესხეთის მასშტაბით, ამ დროის მონაცემებით, ბიუჯეტში ყველაზე მეტი თანხა, – 14.000.700 ლარი, ბორჯომის მუნიციპალიტეტს აქვს; ყველაზე ნაკლები, – 3.000.550 ლარი, კი ასპინძას. ადიგენის მუნიციპალიტეტის 2017 წლის ბიუჯეტის პროექტი 4.171.900 ლარით განისაზღვრა; ახალციხის მუნიციპალიტეტის ბიუჯეტი 6.320.000 ლარია; ქალაქ ახალციხის ბიუჯეტის პროექტი კი 7.908.000 ლარით განისაზღვრა.

საბიუჯეტო კალენდრის მიხედვით, საკრებულოებს ბიუჯეტის პროექტები 15 ნოემბრამდე გადაეგზავნათ. წარდგენიდან 5 დღის ვადაში, საკრებულოებმა პროექტები საჯარო განხილვისთვის გამოაქვეყნეს და საზოგადოებასთან საჯარო განხილვები დაიწყეს.

საკრებულომ ბიუჯეტის პროექტი, შენიშვნებით (მათი არსებობის შემთხვევაში), გამგეობას/მერიას 25 ნოემბრამდე უნდა დაუბრუნოს; აღმასრულებელი ორგანო კი შესწორებულ საფინანსო დოკუმენტს საკრებულოს უკან 10 დეკემბრამდე დაუბრუნებს.

[sknews.ge]