სამცხე–ჯავახეთის ექვსი მუნიციპალიტეტიდან ბიუჯეტი მხოლოდ ერთმა დაამტკიცა

ასპინძის საკრებულოს დეპუტატებმა 2018 წლის ბიუჯეტი, რაც 3 900 000 ლარით გაისაზღვრება, 15 დეკემბერს დაამტკიცეს. საკრებულოს თავმჯდომარის თქმით, მერიიდან ბიუჯეტის პროექტის შესწორებული ვერსიის დაბრუნების შემდეგ, მხოლოდ ერთი საჯარო განხილვა მოეწყო, რის შემდეგაც ბიუჯეტი დამტკიცდა კიდეც.

ასპინძის შემდეგ, ყველაზე ადრე, 22 დეკემბერს, ბიუჯეტის დამტკიცებას გეგმავენ ახალციხეში. ახალციხეში საჯარო განხილვა 19 დეკემბერს მოეწყო.

„ყველაფერი მზად არის, შენიშვნები აღარ შევა და დიდი ალბათობით, სხდომას პარასკევს ჩავნიშნავთ“, – ამბობს ახალციხის მუნიციპალიტეტის საკრებულოს თავმჯდომარე გელა ნოზაძე.

ახალციხის ბიუჯეტი 14 300 000 ლარით განისაზღვრება.

საჯარო განხილვები დაასრულა და პროექტის დასამტკიცებლად ემზადება ადიგენიც. საკრებულოს თავმჯდომარის იმედა მღებრიშვილის თქმით, სხდომა სავარაუდოდ 25 დეკემბერს გაიმართება. ადიგენის ბიუჯეტი 4 მილიონ 700 ლარით დამტკიცდება.

რაც შეეხება სხვა მუნიციპალიტეტებს, ბორჯომის საკრებულომ ბიუჯეტი საჯაროდ განიხილა და შენიშვნებით მერიას 19 დეკემებერს დაუბრუნა.
„სერიოზული შენიშვნები არ გვქონია, სოციალურ სფეროში თანხების გაზრდას ვითხოვთ და ამიტომ უკან დავაბრუნეთ. 27 დეკემბრამდე დრო გვაქვს და დავამტკიცებთ. თან მერიაზეა დამოკიდებული რამდენად მალე დაგვიბრუნებს“, – გვითხრა ბორჯომის მუნიციპალიტეტის საკრებულოს თავმჯდომარემ ზაზა ჩაჩანიძემ.

ბორჯომის მომავალი წლის ბიუჯეტი სავარაუდოდ 17 000 000 ლარი იქნება.

ასევე 17 000 000 ლარამდეა ახალქალაქის 2018 წლის ბიუჯეტი. ახალქალაქში ჯერ საჯარო განხილვები არ დასრულებულა, ამიტომ, ამ ეტაპზე დოკუმენტის დამტკიცების თარიღი ჩანიშნული არ არის.

საჯარო განხილვები დასრულებული აქვს ნინოწმინის საკრებულოს. აქ ბიუჯეტის დამტკიცებას 25 დეკემბერს გეგმავენ. ნინოწმინდის ბიუჯეტი მომავალ წელს 5 მილიონი ლარი იქნება.

თვითმმართველობის კოდექსის მიხედვით, საკრებულოებმა ბიუჯეტები 28 დეკემბრამდე უნდა დაამტკიცონ.

[ლუბა გიორგაძე, სამცხე–ჯავახეთი]