ჯავახეთში ‘ევროპული საქართველოს’ კანდიდატი არსენ კარაპეტიანი იქნება

არსენ კარაპეტიანი მაჟორიტარობის კანდიდატად დღეს, 3 აგვისტოს პარტიის გენერალურმა თავმჯდომარემ, დავით ბაქრაძემ წარადგინა.

"ჩემთვის დიდი პატივია ვიბრძოლო მაჟორიტარობისთვის, ჩემს ულამაზეს მშობლიურ ჯავახეთში. ეს არის განსაკუთრებული არჩვენები, მიზანიც არის ერთი - დავამარცხოთ რუსი ოლიგარქი და დავუბრუნოთ ქვეყანა ხალხს. ჩვენ მზად ვართ ვიბრძოლოთ და უფრო მზად ვართ, რომ გავიმარჯვოთ, რათა ერთხელ და სამუდამოდ მოვაშოროთ მმართველობიდან ოლიგარქი, ქურდები და მაფიოზები. გპირდებით მომავალ ძლიერ საქართველოში ერთ–ერთი უძლიერესი კუთხე იქნება ჩემი ლამაზი ჯავახეთი", - აღნიშნა გამოსვლისას კარაპეტიანმა.

იგი „ერთიანი ნაციონალური მოძრაობის“ მაჟორიტარობის კანდიდატი იყო 2016 წლის საპარლამენტო არჩევნებზეც.

წლების განმავლობაში კარაპეტიანი ძალოვან სტრუქტურაში მუშაობდა. წინა ხელისუფლების დროს, 2012 წლამდე, იყო ნინოწმინდის რაიონული სამმართველოს უფროსი.

„ევროპულმა საქართველომ“ რეგიონებში მაჟორიტარობის კანდიდატები ოფიციალურად დღეს, 3 აგვისტოს ალექსანდროვის ბაღში დაასახელა. ამით პარტიამ წინასაარჩევნო კამპანია ოფიციალურად დაიწყო.

[sknews.ge]