„ევროპულმა საქართველომ“ ბორჯომში მერობის კანდიდატი წარადგინა

ახალციხის შემდეგ, „ევროპულმა საქართველომ“ მერობის კანდიდატი ბორჯომში დაასახელა. თვითმმართველობის არჩევნებზე ბორჯომელების ნდობის მოსაპოვებლად ბაქარ შირაძე იბრძოლებს.

ბაქარ შირაძე 1982 წელს დაბა ბაკურიანში დაიბადა. პროფესიით იურისტია და როგორც თავად ამბობს, წლების განმავლობაში იუსტიციისა და შინაგან საქმეთა სამინისტროებში სხვასხვა პოზიციაზე მუშაობდა. იგი 2013 წლიდან „ერთიანი ნაციონალური მოძრაობის“ წევრი იყო და პარტიის გაყოფის შემდეგ „ევროპულ საქართველოს“ შეუერთდა.

„ჯერ კანდიდატები სხვა კანდიდატები არ დასახელებულან, არვიცი როგორი კონკურენტები მეყოლება, ამიტომ არ ვიცი რა რეალური შანსები შეიძლება მქონდეს გასამარჯვებლად. მიუხედვად ამისა მოსახლეობის ნდობის იმედი მაქვს“, – ამბობს „ევროპული საქართველოს“ ბორჯომის მერობის კანდიდატი ბაქარ შირაძე.

მისივე თქმით, მთავარი პრიორიტეტები ბორჯომის სოფლების გაზიფიცირება, ტურისტული ინფრასტრუქტურის მოწყობა და მოსახლეობის სხვა სოციალური პრობლემების მოგვარება იქნება. კანდიდატი ბორჯომელებს, ბიუროკრატიული ხარჯების შემცირებით პენსიის 45 ლარით გაზრდას პირდება.

პარტია „ევროპული საქართველო“ სამცხე–ჯავახეთში დარჩენილ ოთხი მუნიციპალიტეტის: ადიგენის, ასპინძის, ახალქალაქისა და ნინოწმინდის მერობის კანდიდატებს ხვალ, 8 სექტემბერს დაასახელებს. მათი ვინაობა ცნობილი ხვალ გახდება;

[ლუბა გიორგაძე, ბორჯომი]