ახალციხეში ორი მიკროავტობუსის მძღოლი ერთმანეთს ფიზიკურად დაუპირისპირდა

შემთხვევა საღამოს, დაახლოებით 19:00 საათზე მოხდა. ერთმანეთს ახალციხე-თბილისისა და ასპინძა-თბილისის სამარშუტო ხაზებზე მომუშავე მიკროავტობუსების მძღოლები დაუპირისპირდნენ.

„არ ვიცი რატომ დასცხეს ერთმანეთს. მგონი ერთმა მეორეს მგზავრები „წაართვა“ ამბობენ თვითმხილველები“.

ორივე მათგანს სხეულზე დაზიანებები აღენიშნებათ, ძირითადად თავის არეში, თვალსა და კისერზე: "არაფერი ისეთი არ არის, უბრალოდ, უსინდისოდ მოიქცა," - განაცხადა ერთ-ერთმა მძღოლმა "სამხრეთის კარიბჭესთან".

ადგილზე იმყოფებიან სასწრაფო-სამედიცინო დახმარების ჯგუფი და სამართალდამცველები. ამ დროისათვის, ორივე მათგანი პოლიციაშია გადაყვანილი.

[მარიამ ბარძიმაძე]