ოთხი დაკავებული პირის აღკვეთის შეფარდებაზე ახალციხის რაიონულმა საამართლომ დღეს, 1-ელ აგვისტოს იმსჯელა. ოთხი დაკავებულიდან, ორის ინტერესებს პროცესზე ადვოკატი ნოდარ აკოფაშვილი იცავდა, ორს კი, მარტიროს ოგანესიანი.
პროკურორმა კახა ლეკიშვილმა დააყენა შუამდგომლობა, რომლის მიხედვითაც იგი დაკავებული ოთხი პირისათვის აღკვეთის ღონისძიებად პატიმრობის შეფარდებას ითხოვდა. მისი თქმით, პროკურატურას აქვს დასაბუთებული ვარაუდი, რომ დაკავებული პირები 2020 წლის 17 ივლისს, საღამოს, არაფხიზელ მდგომარეობაში წინასწარი შეთანხმებით , ჯგუფურად, ურთიერთშელაპარაკების ნიადაგზე, ფიზიკურად გაუსწორდნენ შუახნის კაცს „ხელებისა და ფეხების დარტყმით“. რის შედეგადაც, დაზარალებულმა მიიღო მრავლობითი დაზიანებები და გადაიყვენეს სამედიცინო დაწესებულებაში.
ლეკიშვილმა განმარტა, რომ ბრალდების მხარე საქმეში დანაშაულებრივი საქმიანობის გაგრძელების რისკებს ხედავს, ამიტომ მოითხოვს, რომ ოთხივე პირს აღკვეთის ღონისძიებად პატიმრობა შეეფარდოს: „ჩვენ ვთვლით, რომ თუკი ბრალდებულები არ იქნებიან იზოლირებულები, მათი მხირდან მტკიცებულებების მოპოვების ხელისშემშლელი რისკები და ფაქტორები არსებობს. [...]იმისთვის, რომ არ გაგრძელდეს დანაშაულებრივი საქმიანობა, რომ არ განხორციელდეს მტკიცებულებთა მოპოვებისას ხელის შეშლა და ზემოქმედება პროცესის მონაწილეთა მიმართ, ამ რისკებისა და საფრთხეების თავიდან ასაცილებალდ, ჩვენ, ბრალდების მხარემ ჩავთვალეთ, რომ სასამართლოსთვის მიგვემართა ოთხი პირის აღკვეთის ღონისძიების სახით, პატიმრობის შერჩევასთან დაკავშირებით “, - განმარტა პროკურორმა.
პატიმრობის შერჩევის შუამდგოლობას არ დაეთანხმა დაცვის მხარე. ადვოკატმა ნოდარ აკოფაშვილმა პროკურორის ვარაუდებს დანაშაულებრივი საქმიანობის გაგრძელებასთან დაკავშირებით, უსაფუძვლო და დაუსაბუთებელი უწოდა.
მისი თქმით, შემთხვევა 2020 წლის 17 ივლისს მოხდა, რა დროსაც ბრალდებულები სმართალდამცველებმა ფაქტზე აიყვანეს და პოლიციაში გადაიყვანეს, სიმთვრალე-სიფხიზლის ოქმები შეადგინეს და გაუშვეს. ამის შემდეგ კი, იგივე პირები მეორე დღეს ისევ დაიბარეს, გამოკითხეს და კიდევ გაუშვეს: „არის ოქმები, რითაც დასტურდება, რომ ნამდვილად იყვნენ პოლიციაში, შემოწმებული იყვნენ სიმთვრალე-სიფხიზლეზე და მაშინ გამოძიებამ არ ჩათვალა აღნიშნული პიროვნებების მხრიდან რაიმე დანაშაულებრივი საქმიანობის გაგრძელება, ხელის შეშლა და ა.შ. ამიტომ გამოუშვეს. [...] ამის შემდეგ, არანაირი მტკიცებულება არ არის, რომ მათი მდგომარეობა ამ კუთხით გაუარესდა. თუ იყო საფრთხე, მაშინ დანაშაულზე წაასწრეს და დააპატიმრებდნენ, მაგრამ არ ჩათვალეს და არ დააკავეს“, - განმარტა სხდომაზე ნოდარ აკოფაშვილმა.
ადვოკატმა მოსამართლეს საკუთარი დაცვის ქვეშ მყოფებისათვის აღკვეთის ღონისძიებად 5 000 ლარიანი გირაოს შეფარდება მოითხოვა. აკოფაშვილის მოთხოვნას დაეთანხმა მეორე ადვოკატიც, მარტიროს ოგანესიანი.
პროცესზე ოთხივე ბრალდებულმა დანაშაული აღიარა და გირაოს შეფარდება ითხოვა.
საბოლოოდ, მოსამრთლე გოჩა ჯეირანაშვილმა პროკურორის შუამდგომლობა ნაწილობრივ დააკმაყოფილა და ბრალდებულებს გირაო ინდივიდუალურად განუსაზღვრა. მათგან ორს 12 000-12 000 ლარის ოდენობით, ერთს 15 000 ლარი, ერთს კი, 7 000.
გირაოს გადახდამე ოთხივე მათგანი პატიმრობაში დარჩა, თანხის ანაზღაურების ვადა კი 50 დღით განესაზღვრათ.
საქმის განხილვის სასამართლო პროცესი 23 სექტემბერს ჩაინიშნა.
ცემის ფაქტი ახალციხეში, თამარაშვილის ქუჩაზე იუსტიციის სახლისა და პოლიციის შენობის უკან, 17 ივლისს
მოხდა.
[თაკო ფეიქრიშვილი, ახალციხე]