რესტორანში ჩხუბის გამო ოთხი დაკავებულიდან, ერთს პატიმრობა გირაოთი შეუცვალეს

ბექა.ს–ს აღკვეთის ღონისძიებად პატიმრობა 3 დეკემბერს, დაუსწრებლად შეუფარდეს. სამი დეკემბრის სხდომაზე, სასამართლოში პროკურორმა კახა ლეკიშვილმა განაცხადა, რომ ბექა ს. მიმალვაში იყო. სწორედ ამ მიზეზით მას აღკვეთის ღონისძიებად მოსამართლე გოჩა ჯეირანაშვილმა პატიმრობა შეუფარდა. თუმცა, ამავე დღეს, ბრალდებული პოლიციაში თავად გამოცხადდა.

კანონით, როცა ბრალდებულს დაუსწრებლად ეფარდება პატიმრობა, დაკავების შემდგომ პროკურორი ვალდებულია, რომ პატიმრობის დადასტურების მიზნით, იგი 48 საათის განმავლობაში სასამართლოს წარუდგინოს.

ბოლო პროცესზე პროკურორმა კახა ლეკიშვილმა ბრალდებულისთვის აღკვეთის ღონისძიებად პატიმრობის დატოვებაზე იშუამდგომლა, ადვოკატმა ზაზა ზაზაძემ კი მისი გირაოთი გათავისუფლება ითხოვა.

მოსამართლე გოჩა ჯეირანაშვილმა, პროკურატურის შუამდგომლობა არ დააკმაყოფილა. მან ბექა ს.–ს აღკვეთის ღონისძიებად გირაო, 30 000 ლარი შეუფარდა.

„პირველ სხდომაზე საფუძველი იმისა, რომ პატიმრობა შეეფარდა, იყო ის, რომ ბექა ს. მიმალვაში იმყოფებოდა და პროცესს არ ესწრებოდა. მაგრამ, რადგან ამის შემდეგ იგი პოლიციაში თავისი ფეხით მივიდა, მით უმეტეს მას შემდეგ, რაც პატიმრობა შეეფარდა, სასამართლომ მიიჩნია, რომ მისი მიმალვის საფრთხე აღარ არსებობდა, ამიტომ პატიმრობა გირაოთი შეეცვალა“, – გვითხრა მოსამართლე გოჩა ჯეირანაშვილმა.

ბექა ს.–ს და მასთან ერთად ბრალდებულ სამ პირზე დაკავების შუამდგომლობით სასამართლოს პროკურატურამ „ჯინო ველნესში“ მომხდარიდან რამდენიმე საათში, პირველ დეკემბერს მიმართა. თუმცა, მაშინ ბექა ს. ვერ, ან არ დააკავეს. რა იყო ამის მიზეზი, მით უფრო მაშინ, თუ პირი მიმალვაში არ იმყოფებოდა, ამ შეკითხვაზე პასუხს „სამხრეთის კარიბჭე“ პროკურატურიდან ამ დრომდე ელოდება.

მომხდარზე კომენტარს არც ბრალდებულის ოჯახის წევრები აკეთებენ. თუმცა პირად საუბრებში აცხადებენ, რომ ბექა არ მიმალულა.

შეგახსენებთ, რომ ჩხუბი „ჯინო ველნეს რაბათში“ 30 ნოემბერს ღამით, დაახლოებით 23:00 საათზე მოხდა. შედეგად, ორი მამაკაცი დაშავდა, ოთხს კი (მათ შორის ბექა ს–ს) ბრალი სსკ–ის 239–ე მუხლის მესამე ნაწილით წარედგინა, რაც ხულიგნობას ჯგუფურად, ცეცხლსასროლი იარაღით, ან იარაღად სხვა საგნის გამოყენებით გულისხმობს. აღნიშნული მუხლი ითვალისწინებს თავისუფლების აღკვეთას ოთხიდან შვიდ წალმდე.

[თამუნა უჩიძე, ახალციხე]