ახალციხეში მცხოვრები ებრაელები ხანუქას დღესასწაულს აღნიშნავენ

ახალციხელი ებრაელების შთამომავალი, მორწმუნე ებრაელთა საზოგადოების თავმჯდომარე სიმონ ლევიშვილი გვიხსნის, რომ დღეს საღამოს სასანთლეზე პირველი სანთელი დაინთება და რვა დღის განმავლობაში ყოველ დღე ერთი სანთელი დაემატება.

„მზის ჩასვლიდან რამდენიმე საათის გასვლის შემდეგ მეორე დღე იწყება, ანუ ხანუქის პირველი დღეა ხვალ“, - ამბობს სიმონ ლევიშვილი.

ამჟამად ახალციხეში მხოლოდ რვა ებრაელი ცხოვრობს, სამი მამაკაცია და ხუთი ქალი. სიმონ ლევიშვილი ამბობს, რომ წლების განმავლობაში ებრაელთა უმრავლესობამ ახალციხე დატოვა.

ახალციხის ისტორიულ უბანში, რაბათში მდებარეობს სინაგოგა, რომელიც 1863 წელსაა აშენებული. თუმცა, ტაძარში დღეს ლოცვა იშვიათად ტარდება. სიმონ ლევიშვილი გვიხსნის, რომ ებრაული წესით, ტაძარში ლოცვის ჩასატარებლად მინიმუმ 10 მამაკაცია საჭირო.

„სანამ ათი ადამიანი არ შეიკრიბება სინაგოგაში, იქამდე ლოცვის რიტუალი არ ტარდება. ძირითადად ზაფხულობით ტარდება ხოლმე ლოცვა, როცა ტურისტები ჩამოდიან“,- ამბობს იგი.

ხანუქა ძვ. წ. II საუკუნეში, მაკაბელთა მიერ იერუსალიმის ტაძრის გაწმენდის, საკურთხევლის კურთხევისა და სატაძრო მსახურების განახლების აღსანიშნავად დაწესდა.

ვრცლად ახალციხეში მცხოვრები ებრაელების შესახებ, "სამხრეთის კარიბჭე" მოგვიანებით გიამბობთ.

[sknews.ge]