ებრაელები ხანუქას დღესასწაულს აღნიშნავენ

"გუშინ, 6 დეკემბერს, საღამოს დაიწყო დღესასწაულის აღნიშვნა და რვა დღეს გაგრძელდება.დღეს პირველი დღეა. პირველ დღეს ვანთებთ ორ სანთელს. ხანუქა არის სიბნელეზე და ბოროტებაზე გამარჯვება", – ამბობს ახალციხელი ებრაელების შთამომავალი, მორწმუნე ებრაელთა საზოგადოების თავმჯდომარე სიმონ ლევიშვილი.

ამჟამად ახალციხეში მხოლოდ შვიდი ებრაელი ცხოვრობს. სიმონ ლევიშვილი ამბობს, რომ წლების განმავლობაში ებრაელთა უმრავლესობამ ახალციხე დატოვა.

მისი თქმით, ებრაული წესით ტაძარში ლოცვის ჩასატარებლად მინიმუმ 10 მამაკაცია საჭირო, ამიტომ ტაძარში დღეს ლოცვა იშვიათად ტარდება.

ხანუქას დღესასწაული ძვ. წ. II საუკუნეში დაწესდა და ის სინათლის სიბნელეზე, სიკეთის ბოროტებაზე, სამართლიანობის უსამართლობაზე გამარჯვების სიმბოლოა. ამ დღეებში ებრაელი ხალხი დამპყრობლისგან ტაძრის დაბრუნებას ზეიმობს და ასევე იმ სასწაულს აღნიშნავს, როდესაც სოლომონის ტაძარში, მენორაში ერთი დღის სამყოფი ზეთი სასწაულებრივად რვა დღის მანძილზე ანათებდა. ამ სასწაულის აღსანიშნად რვა დღის მანძილზე თითო სანთელი ინთება.

საქართველოში ყველაზე ადრე აშენებული სინაგოგა ახალციხის ისტორიულ უბანში, რაბათში მდებარეობს.

1863 წელს აშენებული სინაგოგა საუკუნენახევარს ითვლის. გარდა ამისა რაბათში კიდევ ერთი სინაგოგაა, რომელიც 1902 წელს აშენდა, თუმცა წლების განმავლობაში მას სხვა დანიშნულებით იყენებდნენ, ამჟამად კი უმოქმედოა.



[sknews.ge]