ებრაული თემი ხანუქას დღესასწაულს აღნიშნავს

ებრაელებისთვის ხანუქას 22 დეკემბერს დაიწყო და რვა დღის შემდეგ, 29 დეკემბერს დასრულდება. ეს მათთვის ზეიმისა და მხიარულების პერიოდია, რადგან მიიჩნევა, რომ ამ დროს სინათლე ამარცხებს სიბნელეს, სამართლიანობა კი უსამართლობაზე იმარჯვებს.

დღესასწაულს აღნიშნავს ახალციხეში მცხოვრები ებრაელი, სიმონ ლევიშვილიც. იგი ამბობს, რომ ამ დღეების განმავლობაში, ებრაელები მენორაზე (რამდენიმეტოტიანი, შანდლის მსგავსი ნივთი) ყოველდღიურად სანთელს ანთებენ: „ეს დღესასწაული გამორჩეულია იმით, რომ სინათლეს უკავშირდება და მის გამარჯვებას ვზეიმობთ. ყოველ დღე თითო სანთელს ვანთებთ. პირველ დღეს ორ სანთელს ვანთებთ, მეორე დღეს სამს, მერე ოთხს და ასე, რვა დღის განმავლობაში, მთლიანობაში 44 სანთელი გამოდის“, - ამბობს ლევიშვილი.

ხანუქას დღესასწაული ძვ. წ. II საუკუნეში დაწესდა, იგი მაკაბელთა მიერ იერუსალიმის ტაძრის გაწმენდას, საკურთხევლის კურთხევასა და სატაძრო მსახურების განახლებას უკავშირდებოდა.

ეს მოხდა ძვ. წ. 165 წელს, მას შემდეგ, რაც ტაძრის ტერიტორია გათავისუფლდა ბერძნულ-სირიული არმიისა და მათი მოკავშირე ებრაელებისგან.

[თაკო ფეიქრიშვილი, ახალციხე]