ქართველი ებრაელები ‘ფურიმს’ აღნიშნავენ

ებრაელთა საზოგადოების თავმჯდომარე ახალციხეში სიმონ ლევიშვილი ამბობს, რომ დღესასწაულს ძირითადად გართობით, ცეკვითა და სიმღერით აღნიშნავენ: „ახალციხეში სულ ორი ოჯახი ვცხოვრობთ. მიუხედავად იმისა, რომ არ გამოგვდის მასშტაბურად ავღნიშნოთ, ვცდილობთ ოჯახის წევრებთან ერთად, მხიარულად გავატაროთ ეს დღეები, რადგან ძირითადად ასე აღინიშნება.პატარებს ვურიგებთ ტბილეულს ვერთობით და ვსვამთ ღვინოს“.

სიმონ ლევიშვილის თქმით, წლების განმავლობაში ებრაელები სინაგოგაში იკრიბებოდნენ და დღესასწაულის დაარსების ისტორიას კითხულობდნენ. ეს ტრადიცია რომ შესრულდეს, სინგოგაში ათი მლოცველი მაინც უნდა იყოს: „ახალციხეში ამდენი ებრაელი არ ვართ, ამიტომ, უკვე დიდიხანია სინაგოგაში ამ ისტორიის წაკითხვას ვერ ვახეხებთ“.

დღესასწაულის ისტორია ასეთია: სპარსელთა მეფე ახაშვეროშის კარისკაცი ამანი, რომელიც წარმოშობით ამალეკელი იყო, უზომოდ გაღიზიანდა, როდესაც მორდეხაიმ მის წინაშე ქედის მოხრაზე უარი განაცხადა და ებრაელების სრული განადგურება გადაწყვიტა. მან მეფე დაარწმუნა განკარგულება გაეცა, რომლის თანახმადაც ნებისმიერ მსურველს, ებრაელების განუსაზღვრელი რაოდენობით განადგურების უფლება ენიჭებოდა. ამანის ჩანაფიქრის განხორციელებას ხელი შეუშალეს ბრძენმა ებრაელმა მორდეხაიმ და მისმა ნათესავმა და აღზრდილმა ესთერმა, რომელიც იმ დროისათვის სპარსეთის დედოფალი გახლდათ.

ესთერი სამეფო კარის მკაცრი ეტიკეტის დარღვევით, ახაშვეროშთან მიწვევის გარეშე გამოცხადდა და მეფე დაარწმუნა, რომ მის მიერ მოწყობილ ნადიმს დასწრებოდა, რომლის დროსაც მას ებრაელების შეწყალების თხოვნით მიმართა.

როდესაც ახაშვეროშმა ამანის ინტრიგების შესახებ შეიტყო, იგი იმავე სახრჩობელაზე ჩამოახრჩობინა, რომელიც მორდეხაისთვის ჰქონდათ მომზადებული. ებრაელების განადგურების თაობაზე გაცემული ბრძანება კი ახლით შეცვალა, რომლის თანახმადაც ებრაელებს თავდაცვის უფლება მიანიჭეს. სასტიკი შეტაკებების შედეგად კი სპარსეთის იმპერიაში მცხოვრებმა ებრაელებმა სპარსელებზე გამარჯვება მოიპოვეს.

[ლუბა გიორგაძე, ახალციხე]