არაქართულენოვან სკოლებში პრაქტიკოსი მასწავლებლები 2023 წლამდე იმუშავებენ

ეროვნული ცენტრის ინფორმაციით, ყველაზე მეტი პედაგოგი, რომელმაც პრაქტიკოსის სტატუსი ვერ შეიცვალა, არაქართულენოვან სკოლებზე მოდის. მათთვის სირთულეს წარმოადგენდა პროფესიული უნარების გამოცდაში ქართულ ენაზე მოცემული ტექსტებისა და პირობების გაგება.

„ეთნიკური უმცირესობებით კომპაქტურად დასახლებულ რეგიონებში განსაკუთრებით მძიმე მდგმარეობაა. ყველაზე დიდ პრობლემას ის წარმოადგენდა, რომ მათ შეეთავაზათ საგნის გამოცდა მშობლიურ ენაზე, თუმცა პროფესიული უნარების გამოცდისას, მათ პირობები უნდა გაეგოთ ქართულ ენაზე. შესაბამისად, მასწავლებლებმა, რომლებმაც არ იცოდნენ სახელმწიფო ენა, უჭირდათ ამ ტექსტის გაგება და სწორი პასუხების დაწერა თუნდაც მშობლიურ ენაზე“, - ამბობს მასწავლებელთა პროფესიული განვითარების ეროვნული ცენტრის დირექტორის მოადგილე მანანა რატიანი.

მისივე თქმით, სახელმწიფო ენის ფლობა არაქართულენოვანი პედაგოგებისთვის მნიშვნელოვანია, მათი სრული ინტეგრაციისთვის. ცენტრს ამ კუთხით პედაგოგებისთვის შეთავაზებაც აქვს: „ამდენი ხნის მანძილზე, ისინი ვერ ესწრებოდნენ ტრენინგებს. შესაბამისად, მათ სახელმწიფო ენის ფლობა აუცილებლად დასჭირდებათ მომავალშიც და ჩვენ ამაში ხელს შევუწყობთ. ვიცით, რომ ჟვანიას სკოლას აქვს შეთავაზებული ენის კურსები, ეს შეთავაზებები უფრო და უფრო მეტი იქნება მასწავლებლებისთვის და ისინი ვალდებულები არიან ენაც ისწავლონ და ამავდროულად გაიარონ პროფესიული განვითარების კურსები. რა თქმა უნდა, საგნის გამოცდაც კვლავაც ძალაში იქნება“.

კონკრეტული შეთავაზებები პედაგოგებისთვის დეტალურად გაიწერება და მათ შესრულებას ისინი სექტემბრიდან შეუდგებიან.

[თაკო ფეიქრიშვილი]