არაქართულენოვანი სკოლების 700-ზე მეტი პედაგოგი ქართული ენის კურსს გადის

განათლებისა მინისტრის მოადგილე ლია გიგაური და მასწავლებელთა პროფესიული განვითარების ეროვნული ცენტრის დირექტორი გიორგი მაჩაბელი ქართული ენის კურსის მიმდინარეობას გაეცვნენ.

ქართული ენის კურსი, არაქართულენოვანი სკოლების მასწავლებელთა პროფესიული განვითარების ხელშეწყობის პროგრამის ფარგლებში, მიმდინარე წლის თებერვლიდან დაიწყო. როგორც მასწავლებელთა პროფესიული განვითარების ეროვნულ ცენტრში აცხადებენ, კურსის პირველი ეტაპი 6 თვის განმავლობაში გაგრძელდება.

მათივე ინფორმაციით, ამჟამად კურსში, კახეთის, ქვემო ქართლისა და სამცხე-ჯავახეთის რეგიონების საჯარო სკოლების 738 პედაგოგია ჩართული. მათგან A1 დონეს 290 მასწავლებელი, ხოლო A2 დონეს 448 პედაგოგი გადის.

„ქართული ენის კურსი ეთნიკური უმცირესობით დასახლებული რეგიონების საჯარო სკოლების არაქართულენოვან მასწავლებლებს წელს პირველად შევთავაზეთ. პირველ ეტაპზე განისაზღვრა ქართული ენის ცოდნის დონე, ამის შემდეგ კი კურსის გავლის მსურველი მასწავლებლები განაწილდნენ A1 და A2 დონეებზე“, – აცხადებენ მასწავლებელთა პროფესიული განვითარების ეროვნულ ცენტრში.

ცენტრის ინფორმაციით, კურსის განხორციელების მიზანია არაქართულენოვანი მასწავლებლების ქართული ენის ცოდნის დონის გაუმჯობესება, სახელმწიფო ენის სწავლებისა და სამოქალაქო ინტეგრაციის ხელშეწყობა: „გარდა ამისა, კურსი ხელს შეუწყობს არაქართულენოვანი მასწავლებლების ჩართულობის გაზრდას და გააქტიურებას მასწავლებლის საქმიანობის დაწყების, პროფესიული განვითარებისა და კარიერული წინსვლის სქემაში“.

[ნინო ნარიმანიშვილი, ახალციხე]