მეთოდური ტრენინგები არაქართულენოვანი სკოლების მასწავლებლებისთვის

მასწავლებელთა პროფესიული განვითარების ეროვნულმა ცენტრმა არაქართულენოვანი სკოლების მასწავლებელთა პროფესიული განვითარების პროგრამის ფარგლებში გრძელვადიანი მეთოდური ტრენინგების ციკლის - ქართულის, როგორც მეორე ენის მეთოდიკა და ენისა და საგნის ინტეგრირებული სწავლების სპეციფიკა - მესამე ეტაპი დაიწყო, რომელიც ქართულის, როგორც მეორე ენის სწავლების პროცესში კითხვითი უნარ-ჩვევების განვითარების თანამედროვე მეთოდიკის გაცნობას ისახავს მიზნად. ტრენინგს პროგრამის 105 კონსულტანტ-მასწავლებელი გაივლის.

კურსის ფარგლებში მასწავლებლებმა უკვე გაიარეს 2 ტრენინგ-მოდული, რომლის ფარგლებში საგნის სწავლების ზოგად მეთოდებსა და ქართულის, როგორც მეორე ენის მასწავლებლის კომპეტენციებს, ასევე მოსმენის უნარ-ჩვევების განვითარების მეთოდოლოგიას გაეცნენ. კურსის თითეულ ეტაპზე მასწავლებლები ონლაინ-პორტალზე იმუშავებენ, ტრენინგის მიხედვით მოამზადებენ საგაკვეთილო გეგმებს და ცენტრის ექსპერტებისგან ინდივიდუალურ კონსულტაციებსაც მიიღებენ.

არაქართულენოვანი სკოლების მასწავლებელთა პროფესიული განვითარების პროგრამა მიზნად ისახავს სახელმწიფო ენის გაძლიერებას, არაქართულენოვანი სკოლების მასწავლებელთა პროფესიულ განვითარებას, სწავლა-სწავლების ხარისხის გაუმჯობესებას და სამოქალაქო ინტეგრაციის პროცესის ხელშეწყობას.

[sknews.ge]