ბორჯომში ‘სერნების’ გზაზე ხეებია მოჭრილი

მოჭრილი და „კოტრებად“ დამზადებული საშეშე მერქნის ფოტო სოციალურ ქსელში ბორჯომელმა ბაკურ გელაშვილმა გაავრცელა. მისი თქმით, „სერნებისკენ“ მიმავალ გზაზე დამზადებული შეშა ადგილობრივმა შეამჩნია. აქაურები ეჭვობენ, რომ შესაძლოა ჭრა უკანონოდ იყოს.

„ერთ-ერთმა ადგილობრივმა, ვინც გაიარა იმან ჩამიგდო, რაც ფოტოში ჩანს, უფრო ნაძვია, ვიდრე ფოთლოვანი. ფაქტია, რომ დამზადებული და დაკოტრილია, მოქალაქემ გამომიგზავნა სურათი და ძალიან ცუდია, რომ ასეთი რამე ხდება ბორჯომში, ტყეში. რას უშლიდა ხელს იმ „სერნების“ გზაზე ვერ გეტყვით“, - ამბობს გელაშვილი.

მისივე თქმით, ბორჯომში ხე-ტყის ჭრის პირველი შემთხევევა ეს არ არის, ამიტომ დასადგენია, ნამდვილად მავნებლის გამო იჭრება ხეები თუ არა.
„ბორჯომში რომ ხე-ტყის მოჭრა ხდება, თუ პლატოს გავიხსენებთ, ვითომ ქერქიჭამიადან გამომდინარე. რამდენად რეალურია და რამდენად საჭიროა ვერ გეტყვით, მაგრამ ფაქტია, რომ პლატოზე ხე-ტყე განადგურებულია და მას ხმობაც ემატება“.

სამცხე-ჯავახეთის სატყეო სამსახურში ამბობენ, რომ გოგირდოვანი აუზებისკენ მიმავალ გზაზე ხეები მავნებლის გამო ხმება, ამიტომ მათი ჭრა მიმდინარეობს.

„ეს კონკრეტული ფაქტი რა არის არ ვიცი, მაგრამ ჩვენ სოციალური ტყე-კაფი გვქონდა. მაგ მიმართუილებით, „სერნებისკენ“ არის ძალიან დიდი ხმობა, მავნებლისგან არის დაავადებული. ბორჯომის პარკსა და მუნიციპალიტეტთან შეთანხმებით ჩვენ გავაკეთეთ ტყე-კაფი, რომ ეს ხმელი ხე, რომელიც ცუდი დასანახი იყო ტურიტებისთვის, სანამ ტურისტული სეზონი დაიწყებოდა მოგვეჭრა. ტურისტული სეზონის დაწყებასთან ერთად, პარკმა მოგვმართა, რომ აღარ არის საჭირო, რადგან მოსახლეობა დადის და ნუღარ ვჭრითო და ჩვენც შევაჩერეთ ჭრა“, - ამბობს უფროსი მეტყევე კობა სილაგაძე.

ოფიციალურად გამოყოფილ ტყე-კაფის ტერიტორიაზე დაკოტრილი საშეშე მერქანი თუ კონტროლს გარეთ, ამისი გარკვევა გარემოს ზედამხედველობის დეპარტამენტის ვალდებულებაა. როგორც აქ ამბობენ, „სერნებისკენ“ მიმავალ გზაზე სანიტარული ჭრები დასრულებულია და ახლა სოციალური ჭრები მიმდინარეობს: „ამ ადგილზე დანომრილი ხე იჭრება. სანიტარული ჭრა დასრულდა და ახლა სოციალური ჭრა იწყება“.

[თაკო ფეიქრიშვილი, ბორჯომი]