ბორჯომის პლატოს ტერიტორიაზე სანიტარული ჭრები იწყება

საქართველოს გარემოს დაცვის სამინისტროს ინფორმაციით, სანიტარულ ჭრებს ბორჯომის მუნიციპალიტეტი განახორციელებს, რომლის დროსაც მოჭრილი და ტყიდან გამოტანილი იქნება მხოლოდ ხმელი ხმობადი და მავნებლით ძლიერ დაზიანებული ხეები. აღნიშნული მასალა დაახლოებით 400 ოჯახს უსასყიდლოდ გადაეცემა. ჭრების პროცესს სამცხე-ჯავახეთის სატყეო სამსახური გაუწევს მონიტორინგს. ჭრების დასრულების შემდეგ კი პლატოს ტერიტორიაზე ეროვნული ტყის აღდგენის სამუშაოები განხორციელდება.

"სამცხე-ჯავახეთის წიწვოვან კორომებში მბეჭდავი ქერქიჭამიას მასობრივი გავრცელება 2011 წლიდან გამოვლინდა. ხმობის ყველაზე მაღალი ინტენსივობა ბორჯომ-ბაკურიანის სატყეო უბნის, ჩარხისწყლის სატყეოს ტერიტორიაზე დაფიქსირდა. ტერიტორია დასახლებულ პუნქტთან სიახლოვის გამო ძირითად სარეკრიაციო ზონას წარმოადგენს და მნიშვნელოვანია მისი შენარჩუნება როგორც ეკოლოგიური მდგომარეობის შენარჩუნებისთვის, ასევე რეგიონის ინფრასტრუქტურისა და ტურისტული პოტენციალის გაუმჯობესების მიზნით. სანიტარული ჭრა, სწორედ აღნიშნული ტერიტორიიდან დაიწყება, ხოლო შემდგომ წლებში რეგიონის მასშტაბით განხორციელდება", – ნათქვამია გარემოს დაცვის სამინისტროს განცხადებაში.

ეროვნული სატყეო სააგენტო, მავნებლებთან ბრძოლის ღონისძიებას ფერომონიანი მწერსაჭერების გამოყენებით 2012 წლიდან ახორციელებს. თუმცა, საუკეთესო შედეგებისთვის როგორც ქართველი, ასევე უცხოელი ექსპერტების მიერ რეკომენდირებულია სანიტარული ჭრების განხორციელება.

[sknews.ge]