რატომ იჭრება ფიჭვის ხეები სოფელ რუსთავთან

ასპინძის მუნიციპალიტეტის სოფელ რუსთავში მცხოვრებლების თქმით, ბოლო დროს სოფელთან ახლოს ფიჭვის ხეები პერიოდულად იჭრება. ამის შესახებ ის ადამიანებიც საუბრობენ, ვისაც ამ გზაზე გავლა ხშირად უხდება.

„ტრენერ–მასწავლებელი ვარ და ყოველდღე დავდივარ ახალციხიდან ახალქალაქში. ერთი ხე რომ მოიჭრას იმას შეამჩნევ და როცა არა ერთია მოჭრილი ის კიდევ უფრო ჩანს“, – აცხადებს ახალციხეში მცხოვრები იამზე მსხვილიძე.

სოფელთან ახლოს მოჭრილი ფიჭვების შესახებ იცის ასპინძის მუნიციპალიტეტის საკრებულოს დეპუტატმა რუსთავიდან ჯემალ იაკობაძემაც: „12 ხე მაინც იქნება მოჭრილი. ვინ რა მიზნით მოჭრა არ ვიცი. გამგეობაში ამაზე ლაპარაკი არ ყოფილა“.

გარემოსდაცვითი ზედამხედველობის დეპარტამენეტში „სამხრეთის კარიბჭეს“ დაუდასტურეს, რომ აქ ხეები ნამდვილად მოჭრილია. თუმცა უწყებაში აცხადებენ, რომ აღნიშნულ ტერიტორიაზე ჭრა მათი ნებართვით „ენერგო–პრო–ჯორჯიამ“ განახორციელა: „მთავრობის განკარგულება აქვთ და მუნიციპალიტეტების მასშტაბით, სადაც ხეები სადენებს ხელს უშლის ჭრიან“.

„ენერგო–პრო–ჯორჯიას“ საზოგადოებასთან ურითიერთობის სამსახურში ამბობენ, რომ ამ დროისთვის კომპანია ჭრებს სამცხე–ჯავახეთის მასშტაბით არსად არ ახორციელებს, სოფელ რუსთავთან კი ნებართვით 15–მდე ხე ოქტომბერში მოჭრეს.

„აქ ხეები მაღალი ძაბვის სადენს უშლიდა ხელს. ეს სადენი ოთხ რაიონს, ახალციხეს, ახალქალაქს, ასპინძასა და ნინოწმინდას ამარაგებს. მას შემდეგ ამ ტერიტორიაზე ჭრა არ განხორციელებულა“, – ამბობს „ენერგო–პრო–ჯორჯიას“ საზოგადოებასთან ურთიერთობის სამსახურის წარმომადგენელი ავთანდილ დვალიშვილი.

მიუხედავად მისი განცხადებისა, ადგილობრივები ირწმუნებიან რომ სოფელთან ხეები პერიოდულად იჭრება. ამაზე საუბრობს იამზე მსხვილიძეც: „ადრე იყო მოჭრილი და ტოტებიც ეყარა, ამ დღეებში რომ გავიარე კიდევ სხვა ხეებიც იყო მოჭრილი. იმედია ამაზე რეაგირებას ვინმე მოახდენს“.






[თამუნა უჩიძე, ახალციხე]