გაჩეხილი ხეები ზაზალოს ტყეში[Video]

ვიდეო მოგვაწოდა მოქალაქემ

ადიგენის მუნიციპალიტეტის სოფელ ზაზალოს ტყეში ათობით მოჭრილი ხე გზაზე დაახლოებით ორი თვეა ყრია. ეროვნული სატყეო სააგენტოს სამცხე-ჯავახეთის სატყეო სამსახურში აცხადებენ, რომ ეს მორები მათ ტყის მცველს აქვს ჩაბარებული როგორც ნივთმკტიცება.

„ეს მოჭრილი ხეები ჩვენ ტყის მცველს აქვს ჩაბარებული მანამდე, ვიდრე გამოძიება დასრულდება“, – ამბობს ეროვნული სატყეო სააგენტოს სამცხე-ჯავახეთის სატყეო სამსახურის უფროსი სოსო რეხვიაშვილი და ამატებს, რომ მომხდარზე საველე აქტი უკვე შედგენილია.

დანაშაული გარემოსდაცვითი ზედამხედველობის სამსახურის წარმომადგენლებმა მარტში გამოავლინეს, თუმცა, როგორც ამავე სამსახურში განგვიმარტეს, პირი, რომელმაც უკანონო ჭრები განახორციელა, ამ დრომდე დაუდგენელია.

„საქმის მასალები, იმის დასადგენად თუ ვინ მოჭრა უკანონოდ ხეები, ადიგენის რაიონულ სამმართველოს გადაეცა. როცა დაადგენენ, ამის შემდეგ დააჯარიმებენ კიდეც. რაც შეეხება მოჭრილ ხეებს, ის ტყის მცველს ჩავაბარეთ რომ უკანონობა მეორედ არ მოხდეს და ვინმემ არ მოიპაროს“, – განუცხადეს „სამხრეთის კარიბჭეს“ გარემოსდაცვის სამინისტროს პრესსამსახურში.

[თამუნა უჩიძე, ადიგენი]