აბასთუმნის ტყეში ხანძრის სალიკვიდაციო სამუშაოები განახლდა

ღამის განმავლობაში საგანგებო სიტუაციების მართვის სამსახურის თერმულმა დრონებმა გააგრძელეს ტერიტორიის მონიტორინგი, ცოცხალი ძალა კი 25 მეხანძრე-მაშველის შემადგელობით უშუალოდ ტყის მასივში მუშაობდა. გათენებისთანავე განახლდა ცეცხლის ქრობის აქტიური სამუშაოები.

"ადიგენის მუნიციპალიტეტის დაბა აბასთუმანში, მოწყობილია შინაგან საქმეთა სამინისტროს საგანგებო სიტუაციების მართვის სამსახურის საველე შტაბი. ტყეში გაჩენილი ხანძარი ლოკალიზებულია და სიტუაცია კონტროლს სრულად ექვემდებარება. სალიკვიდაციო სამუშაოები 13 ივნისს, მთელი დღის განმავლობაში უწყვეტ რეჟიმში მიმდინარეობდა", – აცხადებენ საგანგებო სიტუაციების მართვის სამსახურში.

აბასთუმანში გაჩენილი ხანძრის შესახებ ინფორმაცია შინაგან საქმეთა სამინისტროს საზოგადოებრივი უსაფრთხოების მართვის ცენტრ 112-ში 13 ივნისს დღის 2 საათისთვის შევიდა. ამ ეტაპზე უცნობია რა ფართობია დამწვარი.

ადგილზე მობილიზებული იყო ცოცხალი ძალა 65 მეხანძრე-მაშველის შემადგენლობით. პროცესში, ასევე, ჩართული იყო შინაგან საქმეთა სამინისტროს სასაზღვრო პოლიციის ორი ვერტმფრენი. ვერტმფრენებმა სულ 13 გაფრენა განახორციელეს და ხანძრის კერებს 26 ტონა წყალი დაასხეს.

ტყის მასივში იწვოდა წიწვოვანი ტყის ქვედა საფარი და კუნძები. ხანძარს სამცხე–ჯავახეთის და ქვემო ქართლის მეხანძრე–მაშველები აქრობდნენ.

სამცხე–ჯავახეთის საგანგებო სიტუაციების მართვის სამსახურის უფროსი გიორგი აბრამაშვილი არ გამორიცხავს, რომ აბასთუმანში ხანძარი ხელოვნურად გააჩინეს. ადიგენის მერი ზაქარია ენდელაძე კი ფიქრობს, რომ ხანძარი სავარაუდოდ ტყეში მეხის ჩამოვარდნამ გამოიწვია.





[sknews.ge]