აბასთუმნის ტყეში ხანძარს 65 მეხანძრე–მაშველი აქრობს [ვიდეო]

"შსს–ს საზოგადოებრივი უსაფრთხოების მართვის ცენტრ 112-ში შემოვიდა შეტყობინება, რომ აბასთუმანში, ტყის მასივში შეინიშნებიდა დაკვამლიანება.

შეტყობინების მიღებისთანავე შეტყობინებაზე რეაგირება მოახდინა საგანგებო სიტუაციების მართვის სამსახურმა. მეხანძრე-მაშველებს ადგილზე დახვდათ წიწვოვანი ტყის ხანძარი", – ნათქვამია საგანგებო სიტუაციების მართვის სამსახურის მიერ გავრცელებულ განცხადებაში.

მათივე განმარტებით, მოკლე დროში მოხდა ადგილზე დამატებითი ცოცხალი ძალის მობილიზება, როგორც სამცხე-ჯავახეთის რეგიონიდან, ასევე, ქვემო ქართლიდან. ადგილზე ამ დროისთვის მუშაობს 65 მეხანძრე-მაშველი.

ხანძრის ქრობაში, ასევე, ჩაერთო შინაგან საქმეთა სამინისტროს სასაზღვრო პოლიციის 2 ვერტმფრენი. მათ ტყის ხანძარზე უკვე განახორციელეს წყლის 10 დასხმა.

ადიგენის მერის, ზაქარია ენდელაძის განცხადებით, ხანძარი სავარაუდოდ მეხის ჩამოვარდნამ გამოიწვია: "გუშინ ცუდი ამინდი იყო, სავარაუდოდ მეხი ჩამოვარდა ხანძარი გაჩნდა, კვამლი დღეს შეამჩნიეს".

აბასთუმანში მერის წარმომადგენელი ვასილ გეგენეიშვილი ამბობს, რომ დამწვარია 500 კვ.მ–დე მეტრი ფოთლოვანი ტყის მასივი.





[sknews.ge]