'აქ რაღაც ხელოვნურად არის მომხდარი' – გიორგი აბრამაშვილი აბასთუმნის ხანძარზე [ვიდეო]

სახანძრო–სამაშველო სამსახურში აბასთუმნის ტყეში გაჩენილ ხანძართან დაკავშირებით შეტყობინება დღეს 13 ივნისს, 14:00 საათზე შევიდა.

სამცხე–ჯავახეთის საგანგებო სიტუაციების მართვის სამსახურის უფროსის, გიორგი აბრამაშვილის განმარტებით, ხანძარი დრონების მეშვეობით აღმოაჩინეს. იგი ეჭვობს, რომ აბასთუმნის ტყეში ხანძარი ხელოვნურადაა გაჩენილი.

"მიწის საფარი და ხეებიც სველია, ეს საკმაოდ ეჭვს აჩენს, რომ აქ რაღაც ხელოვნურად არის მომხდარი... დანარჩენს გამოძიება დაადგენს", – განაცხადა ჟურნალისტებთან გიორგი აბრამიშვილმა.



მოხდართან დაკავშირებით, დივერსიას არ გამორიცხავს ადიგენის მუნიციპალიტეტის მერი ზაქარია ენდელაძეც. მისი თქმით, დამწვარია 300 კვ.მ ფართობი, ამ ეტაპზე ხანძარის სალიკვიდაციო სამუშაოები მიმდინარეობს. რამდენიმე საათის წინ ენდელაძემ "სამხრეთის კარიბჭესთან" განაცხადა, რომ ხანძრის გამომწვევი მიზეზი შესაძლოა მეხის ჩამოვარდნა ყოფილიყო.



მეხანძრე–მაშველებმა კარვები გაშალეს, სავარაუდოდ პრევენზიის მიზნით ისინი აბასთუმანში მთელი ღამის განმავლობაში დარჩებიან.



[მარიამ ბარძიმაძე, თინათინ ზაზაძე, ადიგენი]