‘რუსეთიდან იმიტომ წამოვიდნენ, რომ ეჭვი შეეპარათ კორონავირუსზე’ - ეპიდემიოლოგი ახალციხელ ინფიცირებულებზე

ეპიდემიოლოგი ქეთინო ჯინჭვლაძე ამბობს, რომ ახალციხეში ტესტი ჩაუტარდა 25 ადამიანს, რომლებსაც შესაძლო კონტაქტი ჰქონდათ რუსეთიდან შემოსულ სამ ინფიცირებულთან. მისივე თქმით, ყველა მათგანი საკარანტინო სივრცის პერსონალია:

„25 ადამიანი, რომლებსაც ჩაუტარდათ ტესტირება სასტუმროს თანამშრომლები არიან, მათ შორის დაცვის სამსახური. ძალიან დიდი პერსონალია. ამ ადამიანებს სხვა არავისთან არ ჰქონიათ შეხება“, - აცხადებს ჯინჭველაძე.

მისივე თქმით, გავრცელებული ინფორმაცია, რომ ამ სამ ადამიანს საქართველოში შემოსვლის შემდეგ სხვებთან კონტაქტი ჰქონდათ, არასწორია და ისინი ლარსის საბაჟო გამშვები პუნქტიდან პირდაპირ საკარანტინო სივრცეში, პატრულის თანხლებით გადაიყვანეს.

„ამ ოჯახის წევრებმა, როცა იგრძნეს, რომ იყვნენ ცუდად, იქ [რუსეთში] ჩაიტარეს ტესტირება და მიუღიათ უარყოფითი პასუხი. ქალმა შეხედა, რომ ყნოსვა და გემოვნება არ ჰქონდა, შეეპარა ეჭვი და წამოვიდა. თავისი ოჯახის სასტუმრო იყო [საკარანტინო ზონად] იცოდა, რომ კარგად ხდებოდა აქ ყველაფერი, ხარისხიანად და წამოვიდა, იფიქრა მივხედავ თავსო“, - ყვება ქეთინო ჯინჭველაძე.

მისივე ინფორმაციით, საზღვარზე ოჯახის ერთ–ერთი წევრი არ შემოუშვეს. კაცს სიცხეც აღენიშნებოდა.

„ოჯახი წამოსულია პირდაპირ გამიზნულად იმისთვის, რომ ამ საქმისთვის მიეხედათ. საზღვარზე მეუღლე არ გამოუშვეს, იმიტომ, რომ რაღაცა საბუთები არ ჰქონდა წესრიგში, ის ყველაზე ცუდად იყო. ამათ მხოლოდ ყნოსვა და გემოვნება ჰქონდათ შეცვლილი, მაგრამ ამ კაცს თურმე სიცხეც ჰქონია და დააბრუნეს უკან. საზღვარზე ამ ადამიანებმა აუხსნეს, არ გვინდა სხვა საკარანტინო სივრცე, ჩვენს ოჯახს აქვს საკარანტინო სივრცეო. პატრულის თანხლებით ესენი მოვიდნენ პირდაპირ საკარანტინო სივრცეში, გაიტესტნენ, მიიღეს პასუხი და გადაიყვანეს თბილისში. არ ვიცი ეს აჟიოტაჟი რამ გამოიწვია“, - აცხადებს ეპიდემიოლოგი.

ჯინჭველაძე უარყოფს იმ ფაქტსაც, რომ რუსეთიდან შემოსული ოჯახი რამე მასშტაბურ სუფრას ესწრებოდა: „მგონი ვიღაცა მაგათ ბიძაშვილს ჰყავდა სტუმრები და არ ვიცი საიდან მოიგონა ხალხმა ეს ამხელა აჟიოტაჟი“.

გამოაცილა თუ არა პატრულის ეკიპაჟმა ლარსის საბაჟოზე რუსეთიდან შემოსული ახალციხელები, ამ კითხვით „სამხრეთის კარიბჭემ“ შსს-ს მიმართა.

უწყებაში ამბობენ, რომ კონკრეტულ ადამიანებზე ინფორმაციას ვერ გასცემენ, რადგან კონფიდენციალურია, თუმცა აქვე აღნიშნავენ, რომ ყველა პირი, რომელიც საზღვარს გადმოკვეთავს საკარანტინო სივრცემდე პატრულის ეკიპაჟის თანხლებით მიდის: „ზოგადად, როგორც ხდება ხოლმე, როგორც კი ადამიანი შემოდის საზღვარზე, იმას საკარანტინო სივრცემდე აცილებს პატრული. იქ ადგილზე მობილიზებულია დაავადებათა კონტროლის ეროვნული ცენტრის მანქანები, საგანგებო სიტუაციების მართვის სამსახური, ეს ყველა კომპლექსურად არის ჩართული ამ საქმეში და ყველა ერთად კოორდინირებულად მოქმედებენ ასეთ შემთხვევაში. თუ არის თავიანთ მანქანებში, დეზინფექცია უტარდებათ და მიყავთ კონკრეტულ ლოკაციამდე, თუ არა სპეციალურად აღჭურვილი მანქანით გადაყავთ“, - აცხადებენ შსს-ში.

დედა და ორი შვილი მოსკოვიდან 25 მაისს ჩამოვიდნენ. როგორც ერთ–ერთი მათგანი ამბობს, საზღვრიდან პირდაპირ საკარანტინო სივრცეში მოათავსეს. სამ დღეში კი კორონავირუსი დაუდასტურდათ.

[თაკო ფეიქრიშვილი, ახალციხე]