ახალციხეში ბუნებრივი აირით 2 მცირეწლოვანი მოიწამლა

გაზით ინტოქსიკაციის ორივე შემთხვევა ახალციხეში გუშინ, 2 ივნისს დღის მეორე ნახევარში მოხდა. ოთხი წლის მცირეწლოვანი ახალციხის რეფერალურ ჰოსპიტალში შეიყვანეს, ხოლო ორი წლის კლინიკა იმედში. ისინი ამ დრომდე სამედიცინო დაწესებულებებში იმყოფებიან.

„ოთხი წლის პაციენტი, მოთავსებულია ინტენსიური თერაპიის პალატაში. მისი მდგომარეობა სტაბილურია, იმყოფება დაკვირვების ქვეშ“, - გვითხრა ახალციხის რეფერალური ჰოსპიტალის დირექტორმა, რევაზ კუჭუხიძემ.

კლინიკა "იმედში" გვითხრეს, რომ ორი წლის პაციენტს მოწამვლის გარდა, მწვავე რესპირატორული ინფექციაც აქვს, ამიტომ რეანიმაციაში მოათავსეს.

ახალციხეში კომპანია „ინტერგაზის" დირეტორის, ვასილ აბულაძის განმარტებით მცირეწლოვნების მოწამვლა არასწრად დამონტაჟებულმა წყლის გამაცხელებელმა გამოიწვია.

„არასწორად დამონტაჟებული გაზის აპარატურების ბრალია და ორივე გავთიშეთ“, - გვითხრა აბულაძემ.

შინაგან საქმეთა სამინისტროში აცხადებენ, რომ გამოძიება სსკ–ის 240 პრიმა მუხლის პირველი ნაწილით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტის განლაგების, დაპროექტების, მშენებლობის ან ექსპლუატაციის დროს უსაფრთხოების წესების დარღვევას გულისხმობს, რასაც მოჰყვა ჯანმრთელობის ნაკლებად მძიმე ან მძიმე დაზიანება ან რამაც მნიშვნელოვანი ზიანი გამოიწვია, – ისჯება ჯარიმით ან თავისუფლების შეზღუდვით ვადით სამ წლამდე, ანდა თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.

[მარიამ ბარძიმაძე, ახალციხე]